د امریکا یو فډرالي قاضي د مایکل فلین په اړه حکم ځنډولی دی
د نوموړي مدافع وکیلانو د سې شنبې په ورځ د اوسني پروسې د دوام غوښتنه وکړه څو د رابرټ مولر له څېړنو سره لا ډېره همکاري وشي.
فلین اعتراف کړی چې د ۲۰۱۷ میلادي کال په جنورۍ کې یې د امریکا د فډرالي تحقیقاتو د ادارې مامورینو ته د روسیې د سفیر سره د لیدنې په اړه درواغ ویلي.
د سپینې ماڼۍ له دې غونډې درې اوونۍ وروسته چې کله په امریکا کې د روسیې د سفیر سره د مایکل فلین د لیدنې د وخت او د خبرو اترو د محتوا په اړه نور جزئیات څرګند شول، نوموړي له دندې لېرې کړی شو.
د رابرټ مولر په مشرۍ هغه پلټونکي چې د امریکا د ولسمشرۍ په تېرو انتخاباتو کې د روسیې د لاسوهنې په اړه څېړنې کوي، پهدې قضیه کې د فلین همکاري ستایلې او د هغه لپاره یې د نه بندي کېدو غوښتنه کړې.
تر اوسه پورې د امریکا د ملي امنیت د دې پخواني سلاکار د بلې محاکمې نېټه نهده ټاکل شوې.