د غزني والي: د نيول شويو سيمو د تصفيې لپاره محلي اردو جوړېږي
وحيد الله کليمزي د ازادي راډيو خبريال ته وويل چې حکومت دغې اردو ته ټول امکانات برابروي:
"د محلي اردو ټول امکانات او امتيازات له ملي اردو سره برابر دي. صرف توپير يې دا دى چې د سيمې خلک به وي. په خپله سيمه کې به د خپلې سيمې دفاع کوي. وسلې، امتيازونه او معاشونه به يې د ملي اردو په شکل وي."
دا په داسې حال کې ده چې په وروستيو کې د دولت وسله والو مخالفانو د غزني ولايت ځينې سيمې په خپل کنټرول کې راوستلي دي.
د غزني والي تمه ښيي چې دغه محلي اردو به وکړاى شي، له لاسه وتلې سيمې بېرته له وسله والو ونيسي.
تر دې مخکې د افغانستان په نورو ولايتونو کې هم د محلي اردو د جوړولو لپاره نوم ليکنه شوې ده.