«Այդ քարերն ինձ հանգիստ չեն թողնում». պոլսահայ լրագրողն արձագանքել է թուրք նախարարին, որը պնդում է, թե իշխանությունները բազմաթիվ եկեղեցիներ են վերակառուցում
Պոլսահայ լրագրող Արիս Նալջըն արձագանքել է Թուրքիայի զբոսաշրջության և մշակույթի նախարար Նուրի Էրսոյի այն հայտարարությանը, ըստ որի՝ վերջին 11 տարում Թուրքիայի իշխանությունները վերանորոգել են 57 հայկական, հունական, ասորական ու բուլղարական եկեղեցիներ:
Ստամբուլահայ լրագրողը հիշեցրել է նախարարին Արևմտյան Հայաստանի և այժմյան ամբողջ Թուրքիայի տարածքում ավերակների վերածված բազմաթիվ եկեղեցիների ու վանքերի մասին, որոնք հաճախ ենթարկվում են գանձագողերի հարձակումներին, վերավաճառվում մի քանի անգամ կամ դիտավորյալ քանդվում:
Նալջընը նկատում է, որ բամզաթիվ դեպքերում իշխանությունները լուռ են, ինչով էլ փաստացի խրախուսվում է հայկական եկեղեցիների և անգամ գերեզմանատների ավերումն ու վաճառքը:
«Այդ քարերն ինձ հանգիստ չեն թողնում: Չկա մի օր, որ ճանապարհորդություններիս ընթացքում ձեռք բերածս ընկերներից մեկը մի նոր նկար ու պատմություն չուղարկի», - նշել է պոլսահայ լրագրողը:
Լրագրողի խոսքով՝ իրեն հաճախ են դիմում Թուրքիայի տարբեր անկյուններից՝ խնդրելով կանխել մշակութային թալանը:
«Երբեմն Սասունում մահվան եզրին գտնվող ինչ-որ մի կնոջ՝ Ֆրեզնո հասած հայ ազգականներին ենք փորձում գտնել, երբեմն՝ Դերսիմում մի հայ գերեզմանատան վաճառքի հանվելն ենք փորձում կանխել… Շատ անգամ այդ հարցերով ինձ գրողները նշում են, որ դիմել են Թուրքիայում հայկական հիմնադրամներին, սակայն մնացել են անպատասխան: Ամաչում եմ, բայց չեմ զարմանում», - նշել է Նալջընը՝ քննադատելով Պոլսո Հայոց պատրիարքարանին ու այն ղեկավարող Արամ Աթեշյանին, որը հայտնի է թուրքական իշխանությունների հետ իր սերտ կապերով: