Aqmescitniñ Kiyev rayon mahkemesinde qırımtatar faali Edem Bekirovnıñ sıñırlav tedbiri belgilenmekte. Oturışuv vaqtında o, yaramadı, «acele yardım» çağırıldı. Bir kün evelsi Edem Bekirov Qırımnıñ memuriy sıñırında Çonğar keçiş noqtasından keçken soñ onı Rusiye uquq qoruyıcıları tutıp aldı. «Agora» halqara aq qorçalayıcı gruppasınıñ advokatı Aleksey Ladinniñ aytqanına köre, Edem Bekirov Rusiye Ceza kodeksiniñ 222-nci maddesiniñ 1-inci qısmı ve 222-nci maddesiniñ 1.1 qısmı boyunca (patlayıcı madde ve patronlarnı saqlav ve berüv) şeklene, eki madde de orta ağırlıq taşıy. Edem Bekirov – birinci gruppa saqatı, onıñ bir sıra ağır hastalığı bar, advokatnıñ aytqanına köre, «SİZOda tutulması onı qısqa müddet içinde öldüre bile».
