Россия президенти Владимир Путин Узоқ шарқ федерал округи пойтахтини Хабаровскдан Владивостокка кўчирди. Бу ҳақдаги президент қарори 13 декабрь куни Кремль расмий сайтида эълон қилинди.
Минтақа пойтахтини кўчириш таклифини губернаторлик сайловининг иккинчи босқичида чиққан жанжалдан сўнг Путин томонидан Приморск ўлкасининг муваққат раҳбари этиб тайинланган Олег Кожемяко таклиф қилди.
Округ пойтахтини кўчириш заруратини Кожемяко Владивостокнинг хориж раҳбарлари тез-тез халқаро форумларга келадиган шаҳарга айланиб улгургани билан изоҳлади.
Унга кўра¸ Владивостокка пойтахт мақомини бериш минтақага қўшимча даромад келтириш ва федерал ҳукумат эътиборини кучайтиришга ëрдам беради.
Хабаровск ўлкасининг янги губернатори Сергей Фургал бу ташаббусга қарши чиққан ва Хабаровск шаҳрининг том маънода округ марказига айланиб бўлганини таъкидлаган.