Հայաստանի Հանրապետական կուսակցության նախագահի հարցը քննարկվում և լուծվում է համագումարում: Այս մասին լրագրողների հետ զրույցում ասաց ՀՀԿ առաջին փոխնախագահ Վիգեն Սարգսյանը` անդրադառնալով հարցին, թե արդյոք քննարկվել է կուսակցության նախագահի փոխելու հարց:
Նա ասաց, որ 2019 թվականի գարնանը պետք է ունենային համագումար և այս պայմաններում համագումար կազմակերպելը կարևոր գործընթացներից մեկն էր, որը ըստ նրա` ձևականություններից դուրս պետք է լիներ, և այդ համագումարում կուսակցության ղեկավար կազմը պետք ձևավորվեր: «Ես կարծում եմ, որ այս ընտրությունները առաջ բերելուց մեկը մեր կուսակցությանը նորմալ համագումարից կազմակերպելու հնաարվորություններից զրկելն էր տակտիկական առումով»,-ասաց և նշեց, որ կարող էին ձևական կազմակերպել համագումար, ինչպես շատ կուսակցություններ և ձևական որոշումներ կայացնել, բայց չեն ցանկացել:
«Մեր սխալներից մեկն այն է, երևի, եղել, որ մենք կորցրել ենք մեր ուղիղ կապը մեր կուսակցական գործընկերների հետ տեղերում, և այդ կոնտեքստում նախընտրեցինք նորմալ համագումար անցկացնել ընտրություններից հետո»,-ասաց նա:
Վերջինս հայտնեց, որ այսօր փոխվել է կանանց կառույցի ղեկավարը, և Հերմինե Նաղդալյանին փոխարինել է Կարեն Աճեմյանը, իսկ երիտասարդական կառույցի ղեկավար Կարեն Ավագյանի փոխարեն ընտրվել է Անդրանիկ Մարգարյանի անվան քաղաքական դպրոցի տնօրեն Հայկ Մամիջանյանը: Նա ասաց, որ փոփոխությունները կուսակցության արդիականացմամբ են պայմանավորված:
Ինչ վերաբերում է քաղաքական դաշտը սև ու սպիտակի բաժանմանը, նա շեշտեց, որ այդ բաժանումն արդեն արված է, այլընտրանք թողնված չէ: «Մենք միշտ դեմ ենք եղել սև ու սպիտակի բաժանման և վստահ եմ, որ դեկտեմբերի 9-ից հետո այդ բաժանումը կվերանա, և բարիկադները քանդելու ժամանակը կգա»,-ասաց նա:
Վիգեն Սարգսյանը կարևորեց քաղաքական բանավեճը և նշեց, որ ով չի գալիս, դա իր թուլությունն է: Ըստ նրա` բովանդակային լուրջ բանավեճի հարթակ պետք է ձևավորվի: Ինչ վերաբերում հարցին, թե արդար կլինի Նիկոլ Փաշինյանի կողմից, եթե հայտարարի, որ եթե ուզում եք վերջնական հաղթանակի հասնի հեղափոխությունը, ընտրեն ՔՊ-ին, Վիգեն Սարգսյանն ասաց, որ դա բացարձակ խախտում չէ խաղի կանոնների, և տարօրինակ կլինի, եթե գործող վարչապետը, որ քաղաքական ուժի ղեկավար է, այլ բան հայտարարի և պարտավոր է գնալ և քարոզել ՔՊ-ի համա,ր և դա նաև վստահության հանրաքվե է իր հանդեպ:
«Ես տեսնում եմ ուժեր, որոնք կարող են ունենալ տարբեր տիպի ռեսուրս, ես տեսնում եմ նաև հնարավորություն, որ Նիկոլ Փաշինյանը կարող է շատ ուզենալ այդ ուժերին մի փոքր թաքուն կամ մի քիչ ավելի բացահայտ սատարել, որպեսզի ունենա ավելի հարմար ընդդիմություն խորհրդարանում: Վեճը մեկ բանի մասին է. մենք ունենալու ենք մի՞ բևեռ խորհրդարանում, թե՞ բանավեճ:
Ես կարծում եմ, որ եթե Նիկոլ Փաշինյանն ազնիվ է իր ձգտման մեջ՝ նոր Հայաստան կառուցելու, ինքը մենակ մնալով քվեախցիկում՝ քվեարկելու է ՀՀԿ-ի օգտին, քանի որ այլընտրանք պետք է, որ չտեսնի որպես բանավեճի գործընկեր, եթե նա դա չանի, ուրեմն նա ուզում է ունենալ գրպանային ընդդիմություն»,-ասաց նա և նշեց, որ ՀՀԿ-ն վերջին ընտրություններին չի ունեցել այդքան բարձր վարկանիշ, որ իր տոկոսից փորձի մեկ ուրիշին ձայն տալ:
