Մայքլ Ջեքսոնի բաճկոնը, որն արտիստը կրել էր իր համերգային շրջագայություններից մեկի ժամանակ, աճուրդով վաճառվել է 298 000 դոլարով: Ինչպես հայտնում է РИА Новости-ն, վաճառքն իրականացրել է Julien's Auctions աճուրդի տունը Նյու Յորքում:
Աճուրդի տան տվյալներով՝ սև գոտիներով և արծաթե շղթաներով բաճկոնի նախնական արժեքը կազմել է 80-100 հազար դոլար: Հենց այդ բաճկոնն էր փոփի արքան հագել իր առաջին մենահամերգային Bad Tour շրջագայության ժամանակ, որը մեկնարկել էր 1987-ի սեպտեմբերին և ավարտվել 1989-ի հունվարին: Նշվում է, որ բաճկոնի վրա առկա է նաև հանրահայտ երգչի ինքնագիրը:
Աճուրդի հանված իրերի ամբողջական ցանկում ռոքնռոլի հանրահայտ կատարողներին առնչվող ավելի քան 800 առարկա է ընդգրկվել: Դրանց թվում են Էլվիս Փրեսլիի, Բոբ Դիլանի և Էրիկ Կլեպտոնի էլեկտրական կիթառները, ինչպես նաև Արետա Ֆրանկլինի կոշիկներն ու զգեստը և Մադոննայի զարդերը:
Հիշեցնենք, որ աշխարհահռչակ երգչի կյանքն ընդհատվեց 2009-ի հունիսի 25-ին 50 տարեկան հասակում սրտի կանգից: