Ավստրիայում Ռուսաստանի օգտին աշխատող ևս մեկ «լրտես» են բացահայտել

Ավստրիայում Ռուսաստանի օգտին աշխատող ևս մեկ լրտես են բացահայտել, ըստ լրատվամիջոցների, վերջինս Սահմանադրության պաշտպանության ու ահաբեկչության դեմ պայքարի Դաշնային ծառայության աշխատակից է, ով գաղտնի տեղեկություններ է փոխանցել իր ռուսաստանցի ղեկավարներին:


Ենթադրյալ լրտեսի անունը չի հրապարակվում, Մոսկվան առայժմ հրաժարվում է մեկնաբանություններից:


Ավելի վաղ՝ անցած ուրբաթ, հաղորդվել էր, որ Ավստրիայում 70-ամյա մի պաշտոնաթող գնդապետ է ձերբակալվել՝ տասնամյակներ շարունակ Ռուսաստանի օգտին լրտեսություն անելու կասկածանքով:


Սկանդալը լուրջ հարված է հասցրել ռուս-ավստրիական հարաբերություններին, Ավստրիայի իշխանությունները բացատրություն են պահանջել, արտգործնախարարը չեղարկել է դեկտեմբերին Մոսկվա կատարելիք այցը: Ռուսաստանը կտրականապես հերքել է մեղադրանքները: