Յուրի Վարդանյանի աճյունը տեղափոխվել է Հայաստան, հուղարկավորությունը տեղի կունենա նոյեմբերի 13-ին Կոմիտասի անվան պանթեոնում
ԽՍՀՄ սպորտի վաստակավոր վարպետ, հայազգի աշխարհահռչակ ծանրորդ, օլիմպիական խաղերի, աշխարհի և Եվրոպայի բազմակի չեմպիոն Յուրի Վարդանյանի աճյունը գիշերը՝ 2:30, տեղափոխվել է Հայաստան:
Այս մասին Tert.am-ի հետ զրույցում ասաց Յուրի Վարդանյանի մահվան կապակցությամբ ստեղծված կառավարական հանձնաժողովի անդամ, տրանսպորտի, կապի և տեղեկատվական տեխնոլոգիաների նախարարի առաջին տեղակալ Արմեն Փամբուխչյանը։
«Յուրի Վարդանյանի աճյունը կտեղափոխվի Գյումրիի Սուրբ Հակոբ եկեղեցի, որտեղ էլ վաղը տեղի կունենա հոգեհանգստի արարողությունը: Այնուհետև կբերվի Երևան՝ Կարեն Դեմիրճյանի անվան մարզահամերգային համալիր»,- ասաց նա և հայտնեց, որ հուղարկավորությունը տեղի կունենա նոյեմբերի 13-ին Կոմիտասի անվան պանթեոնում:
Հիշեցնենք` Յուրի Վարդանյանը կյանքից հեռացել է նոյեմբերի 2-ին 62 տարեկանում: