عیسوۍ مېرمن اسیه بي بي چې د اسلام پیغمبر ته په سپکاوي تورنه وه او تېره میاشت د پاکستان سترې محکمې برأت ورکړ، غواړي چې جرمني ته لاړه شي.
د اسیه بي بي مدافع وکیل سیف الملوک په یوه تبصره کې چې د جرمني په بیلډ ایم څایتونګ ورځپاڼه کې خپره شوې، لیکلي:
"که اسیه بي بي وکړای شي چې له خپلې کورنۍ سره جرمني ته لاړه شي، خوشحاله به شي."
تر دې وړاندې ویل شوي وو چې اسیه بي بي هالنډ ته پناه وړې ده، خو د پاکستان حکومت دا خبره رد کړه.
جرمني او یو شمېر نورو اروپايي هېوادونو ویلي چې که اسیه بي بي او کورنۍ یې ورشي، نو منلو ته یې تیار دي.
بیلډ ایم څایتونګ ورځپاڼې د جرمني د بهرنیو چارو د وزارت په قول ویلي چې له پاکستاني چارواکو سره سلا مشورې کوي.
د اسیه بي بي خاوند عاشق مسیح د ایټالیا له حکومت څخه پناه غوښتې ده او ایټالیا ویلي چې د موضوع په اړه له پاکستاني چارواکو سره سلا مشوره کوي.
