Ներկայի Թուրքիայի տարածքում գտնվող Վանա լճի հյուսիսային ափի շրջաններից Արճեշում թուրք հնագետները հինավուրց «քարե» քաղաքի հետքեր են հայտնաբերել, որը ենթադրաբար կարող է 2600 տարվա պատմություն ունենալ:
Ինչպես գրում է թուրքական haberler.com կայքը, 270 հա տարածքի վրա սփռված քաղաքում ժամանակին կարող է ապրած լինել շուրջ 70 000 մարդ: Տևական պեղումներից հետո հայտնաբերվել են պարիսպների ու առանձնացված փողոցների հետքեր: Առեղծվածային հին քաղաքի հատակագիծն ավելի հստակ երևում է վերևից:
Հնագետները նկատում են, որ պողոտաներն ու փողոցները քաղաքում բավականին լայն և ուղիղ են եղել, այստեղ կան նաև 35x35 մետր չափսերով առանձնացված բազմաթիվ բլոկեր, որոնցից յուրաքանչյուրում ենթադրաբար կարող է գտնված լինել 4 տուն:
Սպասվում է, որ հաջոդր տարի հնագետներն առավել մանրամասն ուսումնասիրություններ կունենան այստեղ:
Անցյալ տարի Վանի նահանգում հնագետները 2.800 տարվա ցորենի սերմ էին գտել: Սերմերը հայտնաբերվել են Վան քաղաքից 25 կմ հեռավորության վրա՝ ուրարտական Սարդուրի Երկրորդ արքայի ենթադրյալ ամրոցի պարիսպների մոտակայքում:
