«Միլանի» գլխավոր մարզիչ Ջեննարո Գատտուզոն մեկնաբանել է թիմում մեծ թվով վնասվածքներ ունենալու հետ կապված վիճակը: Նա նաև խոսել է Ա Սերիայի 12-րդ տուրում «Յուվենտուսի» հետ կայանալիք խաղի սպասելիքներից:
«Ես պետք է սպասեմ բժշկական անձնակազմի հաշվետվությանը, քանի որ ես մարզիչ եմ, ոչ թե բժիշկ: Իմաստ չունի մտածել վնասվածքների մասին, մենք կխաղանք այն ֆուտբոլիստներով, որոնք այս պահին կան մեր տրամադրության տակ: Մենք պետք է կռիվ տանք մինչև վերջ, քանի որ արդարացումներ փնտրելը մեզ ոչնչի չի հասցնի:
«Յուվենտուսը» Եվրոպայի լավագույն թիմերից մեկն է, էլ չեմ ասում Իտալիայի մասին, բայց, չնայած բոլոր հանգամանքներին, մենք չենք պատրաստվում նստել ու լաց լինել: Մենք դուրս ենք գալու խաղադաշտ ու խաղալու ենք մեր ֆուտբոլը», – Գատտուզոյի խոսքերն է մեջբերել Football Italia-ն՝ հղում անելով Sky Sport Italia-ին:
«Միլան» – «Յուվենտուս» խաղը կկայանա նոյեմբերի 11-ին, «Սան-Սիրո» մարզադաշտում»: Խաղը կսկսվի 22:30-ին:
