Keriç politehnik kollecinde olğan patlav aqibetleriniñ mesüliyeti ve qabaatı «Qırımnıñ Rusiye akimiyetindedir». Bu aqta Qırımtatar Milliy Meclisiniñ reisi Refat Çubarov bildirdi.
«Qırımtatar Milliy Meclisi adından Rusiye işğali altındaki Keriç şeeriniñ politehnik kollecinde olğan faciada elâk olğan ve yaralanğanlarnıñ tuvğanları ve yaqınlarına taziyeler bildirem. Facia aqibetlerinden Rusiye işğalci akimiyeti ve Qırımnı işğal etken devlet – Rusiye Federatsiyasınıñ akimiyet organları mesüliyetli ve qabaatlı», – dep yazdı o, Facebookta.
Politehnik kollecinde olğan patlav neticesinde eñ az 18 kişi elâk oldı, 40 insan yaralandı.
Patlav çarşenbe künü Keriç politehnik kollecinde oldı. Rusiyeniñ terrorizmge qarşı milliy komiteti, kollecde bomba patlağanını bildire.
Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi».
