Ղրիմի արևելքում գտնվող Կերչ քաղաքի պոլիտեխնիկական քոլեջում այսօր տեղի ունեցած պայթյունի հետևանքով զոհեր ու վիրավորներ կան:
«Նովոստ»-ի գործակալությունը՝ վկայակոչելով արտակարգ իրավիճակների ծառայության աղբյուրները, հաղորդում է, որ շենքի ներսում գազ է պայթել, որի հետևանքով 10 մարդ է զոհվել, մոտավորապես 40-ը վիրավորվել են:
Ռուսական պետական ՏԱՍՍ գործակալությունը ևս վկայակոչելով անանուն աղբյուրները, հաղորդել է, որ 70 մարդ է տուժել, որոնցից մի քանիսը զոհվել են:
Ակնանատեսները հայտնում են, որ շենքի մոտ բժշկական շատ մեքենաներ կան: Ըստ որոշ լուրերի, պայթյունը տեղի է ունեցել քոլեջի սրճարանում:
Կերչի պոլիտեխնիկական քոլեջը պետական բյուջետային ուսումնական հաստատություն է, որի հիմնադիրը Ղրիմում Ռուսաստանի կրթության նախարարությունն է:
