Երևանի «Փյունիկը» ՀՀ Բարձրագույն խմբի առաջնության չորրորդ տուրում Գյումրիում հյուրընկալվել է «Շիրակի» կողմից և 2:1 հաշվով կամային հաղթանակ է տարել:
Հանդիպման հաշիվը խաղի արդեն երկրորդ րոպեին բացել են «Շիրակի» ֆուտբոլիստները. ամերիկացի հարձակվող Էդեր Արեոլան է աչքի ընկել տուգանայինի մատույցներից կատարած դիպուկ հարվածով և առաջ մղել գյումրեցիներին:
Իսկ երկրորդ կեսի առաջին րոպեին գեղեցիկ գոլով աչքի է ընկել արդեն «Փյունիկի» ֆուտբոլիստ Էրիկ Վարդանյանը, ով փոխարինման մտնելուց անմիջապես հետո գրավել է «Շիրակի» դարպասն ու հավասարեցրել հաշիվը:
Հանդիպման վերջնահաշիվը ձևակերպվել է խաղի 64-րդ րոպեին, երբ Մոհամեդ Կոնատեն գրավել է մրցակցի դարպասն ու հաղթանակ պարգևել Անդրեյ Տալալաևի թիմին:
Այս կերպ, երևանյան թիմը երկրորդ անընդմեջ հաղթանակն է տարել և անցկացրած երկու խաղերից հետո վաստակելով 6 միավոր` զբաղեցնում է մրցաշարային աղյուսակի երկրորդ հորիզոնականը: «Շիրակը» 3 միավորով 6-րդ տեղում է:
