Այսօր շատ թոշակառուներ ստանում են շատ ցածր թոշակ, որոշ դեպքերում կարելի է կոչել ծերության նպաստ: Այսօր պաշտոնավորման 100 օրն ամփոփող ասուլիսին նման հայտարարություն արեց ՀՀ աշխատանքի և սոցիալական հարցերի նախարար Մանե Թանդիլյանը: Նախարարը շեշտեց՝ ՀՀ-ում իսկապես կան ծայրահեղ աղքատ քաղաքացիներ, և հայտարարեց, որ իրավիճակը փոխվելու է:
«Ոչ մի բան չի կարող արդարացնել վիճակը, որ մեր երկրում կան ծայրահեղ աղքատ թոշակառուներ: Սրանք քաղաքացիներ են, որոնք այս կամ այն պատճառով ստանում են պարենային զամբյուղից նվազ կենսաթոշակ: Մեր երկրում չի լինելու քաղաքացի, որը ստանալու է պարենային զամբյուղից նվազ կենսաթոշակ: Այս մասին արդեն համաձայնություն ունենք»,- ասաց նա:
Թանդիլյանի խոսքով՝ ասածը վերաբերում է մոտ 80 հազար քաղաքացու: Նա նկատեց, որ 2016 թվականի դրությամբ նվազագույն պարենային զամբյուղը 23 հազար դրամից ավելի էր, հիմա դա հասած կլինի 25 հազար դրամի:
«Բնական է, որ սա նաև ռեսուրսի խնդիր է, բայց մի օր պետք է հասկանանք, որ մեր երկիրը պարտավոր է նվազագույն կենսամակարդակն ապահովել: Նախընտրելի է զգալի բարձրացնել նման ցածր կենսաթոշակ ստացող անձանց կենսաթոշակը, քան ասենք, հազար դրամով բարձրացնել բոլորի կենսաթոշակը»,- եզրափակեց Մանե Թանդիլյանը: