Գերմանիայի խորհրդարանի կողմից Հայոց ցեղասպանության մասին բանաձևի ընդունման հարցում մեծ ներդրում ունեցած Կանաչների կուսակցության՝ թուրքական արմատներ ունեցող համանախագահ Ջեմ Օզդեմիրը Գերմանիայի իշխանություններին առաջարկել է օգտվել Թուրքիայում սկսված տնտեսական ճգնաժամից ու ժողովրդավարական բարեփոխումներ պահանջել այդ երկրի իշխանություններից։
Ինչպես գրում է գերմանական DW գործակալության թուրքական ծառայությունը, Օզդեմիրն իր կոչն ուղղել է Գերմանիայի կանցլեր Անգելա Մերկելին՝ հիշեցնելով, որ Թուրքիան տնտեսական առումով մեծապես կախված է Եվրոպայից, և նրա ամենահզոր առևտրային գործընկերը հենց Գերմանիան է։
Ըստ Օզդեմիրի՝ այժմ, երբ Թուրքիան գտնվում է տնտեսական դժվարին պայմաններում, ճիշտ ժամանակն է օգտագործելու այդ երկրի վրա ունեցած ազդեցությունը՝ ստիպելով Անկարային անհրաժեշտ ժողովրդավարական բարեփոխումներ կատարել՝ առաջին հերթին ազատ արձակելով բոլոր քաղբանտարկյալներին, որոնց թվում կան նաև Գերմանիայի քաղաքացիներ։
Թուրքական արմատներով գերմանացի քաղաքական գործիչը նաև կարծիք է հայտնել, որ Թուրքիայում սկսված տնտեսական ճգնաժամը նախագահ Ռեջեփ Թայիփ Էրդողանի՝ փորձագետներին չլսելու սովորության հետևանքն է։