Ռոբերտ Քոչարյանի մամուլի ասուլիսի տապալումը, վերջինիս գրասենյակի ղեկավար Վիկտոր Սողոմոնյանի գնահատմամբ՝ «իշխանության կողմից արված ճարահատյալ ու կոպիտ մի փորձ էր՝ խոչընդոտելու քաղաքական ընդդիմախոսների ազատ արտահայտվելու և հանրության հետ լրատվամիջոցների օգնությամբ շփվելու հնարավորությունը»:
Ռոբերտ Քոչարյանի գրասենյակն այսօր հայտարարություն է տարածել, որում պնդվում է, թե տեղի ունեցածը «ոչ այլ ինչ է, քան այլախոհության բիրտ ճնշում, կամ ինչպես վերջերս ասել էր հայտնի քաղաքական գործիչներից մեկը` մտքի տեռոր»:
Ըստ փաստաթղթի, ակնկալվում էր, որ ասուլիսի ընթացքում պետք է արվեին կարևոր քաղաքական հայտարարություններ և տրվեին բազմաթիվ հարցերի պատասխաններ: «Սակայն մի խումբ մարդիկ, ովքեր հանրությանը քաջածանոթ են որպես մերձիշխանական ակտիվիստներ և Նիկոլ Փաշինյանի մտերիմներ ու զինակիցներ, խանգարեցին դրա անցկացմանը և տեսախցիկների առաջ էժանագին բեմականացում խաղարկեցին` ներկայանալով որպես «զայրացած ժողովուրդ»», - նաև ասված է երկրորդ նախագահի գրասենյակի տարածած հայտարարության մեջ:
Դրա հեղինակաները նաև նշում են․ «Պարզ է, որ նախագահ Ռոբերտ Քոչարյանը, այսպես թե այնպես, նոր ասուլիսի կամ հարցազրույցի միջոցով կհրապարակի իր տեսակետները քաղաքական ամենաարդիական հարցերի վերաբերյալ: Այսօրվա միջադեպը հաստատում է մտավախությունները, որ նոր իշխանությունները չեն հանդուրժում այլախոհությունը և ունակ են քաղաքական հետապնդումներ իրականացնել ընդդիմախոսների նկատմամբ, հատկապես նրանց, ում քաղաքական կշիռն ու հեռանկարները իրենց համար լուրջ անհանգստությունների առիթ են հանդիսանում»:
17 օր անազատության մեջ անցկացնելուց և Վերաքննիչ քրեական դատարանի երեկվա որոշմամբ ազատ արձակվելուց հետո Ռոբերտ Քոչարյանն այսօր «Էրեբունի-Պլազա» բիզնես-կենտրոնում մամուլի ասուլիս էր հրավիրել: Մինչ ասուլիսի մեկնարկը, սակայն, մի քանի տասնյակ ցուցարարներ ներխուժեցին դահլիճ և տապալեցին նախատեսված միջոցառման անցկացումը:
Այսօր ավելի վաղ երկրորդ նախագահի փաստաբաններից Հայկ Ալումյանը, անդրադառնալով Հատուկ քննչական ծառայության՝ նախօրեին տարածած հաղորդագրությանն այն մասին, թե Վերաքննիչ քրեական դատարանը դուրս է եկել իր լիազորությունների շրջանակից ու ապօրինի որոշում կայացրել, պնդեց՝ ցավալի է, որ այդ պետական մարմինն իրեն իրավունք է վերապահում նման գնահատական հնչեցնել: Ապա Ալումյանը հավելեց՝ Հատուկ քննչական ծառայությունը լավ չի պատկերացնում իր ասած արտահայտության իմաստը և իր սեփական լիազորությունների շրջանակը:
Ասյօր Դատախազությունից հայտնեցին, որ Ռոբերտ Քոչարյանի կալանավորումը վերացնելու որոշումը ստանալուց հետո դրան համահունչ բողոք կներկայացնեն:
Վերաքննիչ դատարանն անցած շաբաթավերջին դռնփակ նիստում երկու օր շարունակ քննում էր Քոչարյանի խափանման միջոց կալանավորումը փոխելու հարցը: Քննվում էր երկու միջնորդություն․ դրանցից մեկն առաջին ատյանի դատարանի որոշումը բեկանելու և նախկին նախագահին ազատ արձակելու պահանջին էր վերաբերում, մյուսը վերջերս գործին միացած փաստաբան Հայկ Ալումյանի միջնորդությունն էր՝ կալանքը գրավով փոխարինելու մասին:
Երկուշաբթի օրը վերաքննիչը վերացրեց առաջին ատյանի դատարանի որոշումը և բավարարեց Քոչարյանի պաշտպանների ներկայացրած՝ խափանման միջոց կալանքը փոխելու միջնորդությունը:
Քոչարյանը 2008 թվականի «մարտի 1-ի» քրեական գործով մեղադրվում է սահմանադրական կարգը տապալելու մեջ: Հուլիսի 27-ին Երևանի ընդհանուր իրավասության դատարանը նրա նկատմամբ խափանման միջոց էր ընտրել կալանավորումը:
