რუსეთი აცხადებს, რომ შარშან დაასრულა თავისი ქიმიური იარაღის არსენალის განადგურების პროცესი, რითიც პასუხობს აშშ-ის მიერ წამოყენებულ მოთხოვნას, რომ რუსეთმა ქვეყანაში შეუშვას ქიმიური იარაღის ექსპერტები, რუსეთის ყოფილი ჯაშუშის მოწამვლის შემდეგ. რუსეთმა თავისი ქიმიური იარაღის არსენალი გაანადგურა "მკაცრი საერთაშორისო კონტროლის პირობებში, ქიმიური იარაღის კონვენციასთან სრული შესაბამისობით" - განაცხადა რუსეთის საგარეო საქმეთა სამინისტრომ 13 აგვისტოს. სამინისტროს აზრით, ახლა არა რუსეთი, არამედ აშშ წარმოადგენს "ქიმიური იარაღის კონვენციის ერთადერთ მონაწილეს, რომელსაც სამხედრო დონის ტოქსიკური ნივთიერებების მნიშვნელოვანი რეზერვი აქვს". აშშ-მა გასულ კვირაში განაცხადა, რომ გააფართოებს სანქციებს რუსეთის წინააღმდეგ, თუკი მოსკოვი ქვეყანაში არ შეუშვებს ექსპერტებს ქიმიური იარაღის აკრძალვის ორგანიზაციიდან, რათა მათ დაადასტურონ, რომ მას აღარ აქვს ქიმიური იარაღი. აშშ, ბრიტანეთი და დასავლეთის სხვა ქვეყნები რუსეთის მთავრობას სდებენ ბრალს მარტში, ინგლისის ქალაქ სოლსბერიში რუსეთის ყოფილი ორმაგი აგენტის, სერგეი სკრიპალის და მისი ქალიშვილის, იულიას მოწამვლაში ნივთიერება "ნოვიჩოკით". მოწამლულები სიკვდილს გადაურჩნენ.
