افغان پوځي چارواکي وايي چې د فاریاب غورماچ ولسوالۍ کې د چینایي کمپ په نامه قرارګاه تېره شپه د طالبانو لاس ته ورغلې.
د افغانستان په شمال کې د شاهین قول اردو ویاند ډګرمن حنیف رضایي ازادي راډیو ته وویل چې د قرارګاه محاصره شویو سرتېرو دوه ورځې مقاومت وکړ.
ښاغلی رضاييز زیاتوي:
"۲۶ کسه ټپیان او شهیدان د چینایانو په کمپ کې پاتې دي چې اوس د طالبانو لاس ته ورغلي دي هغه شمېرې چې ما ترلاسه کړې یو شمېر سربازان، یعنې نور عسکر چې هلته وو فکر کوم یو ټولی د ملي اردو وو او شااوخوا ۳۰ کسه د سرحدي ځواکونو وو، دوی له کمپه لوېدیځ لور غونډیو ته وتلي دي."
ډګرمن رضایي زیاتوي چي له کمپه وتلي سربازان تسلیم شوي نهدي، خو دقیقه شمېره نهده معلومه چې څومره عسکر مړه او ټپیان یا اسیران شوي دي.
