Եվրոպա լիգայի որակավորման 3-րդ փուլի «Ալաշկերտ»-«Կլուժ» (0:2) հանդիպումից հետո մամուլի ասուլիսին ներկայացավ Վարուժան Սուքիասյանի օգնական Կարեն Բարսեղյանը, ով մանրամասնեց, թե ինչում է բացակայում Սուքիասյանը:
«Նախ, ներողություն եմ խնդրում: Այսօր՝ օրվա ընթացքում, Վարուժան Սուքիասյանը կանգնել է առողջական լուրջ խնդրի առաջ, անգամ շտապօգնություն է եկել, սիստեմա են միացրել»:
Ինչպես հայտնի դարձավ, Սուքիասյանը թունավորվել է:
«Շնորհակալ եմ նախ երկրպագուներին: Մենք հետևություններ կանենք մեր սխալներից:
Նման թիմերի դեմ խաղերում անընդունելի է նման խաղը պաշտպանությունում: Պետք է առաջ շարժվել:
Հարվածները շատ էին, հարձակման գծում, այո, ունենք խնդիրներ, պետք է լրացնենք այդ բացը: Ուրախալի է, որ Մանուչարյանն աստիճանաբար մարզավիճակ է հավաքում»,- ասաց Բարսեղյանը:
- Տպավորություն է, որ երբ թիմը պարտվում է, Դուք եք գալիս ասուլիսի, երբ հաղթում է, Վարուժան Սուքիասյանը. ամբողջ խաղի ընթացքում նա ոտքի վրա էր, արդյո՞ք չէր կարող ասուլիսի գալ:
- Հավատացնում եմ, որ նա խաղից առաջ է դուրս գրվել հիվանդանոցից, իրոք ի զորու չէր և մի կերպ է կարողացել խաղին ներկա լինել: Պետք չէ ինտրիգներ փնտրել: Ես ասուլիսի գալով՝ կրում եմ ամբողջ պատասխանատվությունը:
- Նշեցիք,որ խաղից հետո գնահատելու եք իրավիճակը և առաջ շարժվել: Առաջ շարժվելը հույսեր ունենա՞լն է:
- Քանի դեռ կա նույնիսկ 1 տոկոս հնարավորություն, շարժվելու ենք մինչև վերջ: Չենք գնալու այնտեղ ժամանակ անցկացնելու: Իհարկե, շատ բարդ է, ծայրահեղ աստիճճանի դժվար: Գնալու ենք իրավիճակը շտկելու:
- Մրցակցի խաղում անակնկալ կա՞ր:
- Հավատացեք, մենք մրցակցի խաղը շատ լուրջ ուսումնասիրել ենք: Այսօր անակնկալ էր սուր, «ծակող» փոխանցումները մեր պաշտպանների մեջքի հետևից: «Կլուժից» բացակայում էին 3 ֆուտբոլիստներ, եթե նրանք լինեին, գուցե թիմը այլ կերպ խաղալ: Կարծում եմ՝ մենք վերահսկում էինք խաղը. շուտ գոլ խփելու հետևանքով մրցակիցը գնդակը տվել էր մեզ: Հարձակման գծում մենք բավարար ագրեսիվ չէին:
- «Ալաշկերտի» հաջողությունը 3-րդ փուլում համարո՞ւմ եք պատմական:
- Խաղացել ենք թիմի դեմ, որի բյուջեն 100 միլիոն է...: Մենք պատմություն ենք կերտել: Եկեք խոսենք լավ բաներից: «Սելթիկը» մեզնից որակապես շատ բարձր էր: Ես հպարտ եմ, որ այս թիմի մի մասնիկն եմ:
- Այս խաղին Դաշյանը ևս չմասնակցեց. դեռ չի՞ վերականգնվել: Նաև բացակայում էր Զելկովիչը:
- Վերջինս դուրս է մնացել հայտացուցակից: Դաշյանի հարցում կա ռիսկի գործոն: Առջևում ունենք լուրջ խաղեր:
