Պաշտոնաթող նախագահ Ռոբերտ Քոչարյանի նկատմամբ կալանքը որպես խափանման միջոց կիրառելու՝ առաջին ատյանի դատարանի որոշման դեմ վերաքննիչ բողոքի քննությունը կշարունակվի օգոստոսի 10-ին:
«Հետաձգման պատճառն այն է, որ գործը մինչև հիմա քննվում էր և դեռ շատ փաստարկներ պետք է ներկայացվեին երկու կողմերից», - «Ազատության» հետ զրույցում նշեց Քոչարյանի պաշտպան Հայկ Ալումյանը: - «Գործի քննությունը հետաձգվեց մինչև վաղը՝ ժամը 14:00»:
Վերաքննիչ դատարանում քննվում է երկու միջնորդություն, մեկը՝ առաջին ատյանի դատարանի որոշումը բեկանելու և Ռոբերտ Քոչարյանին ազատ արձակելու պահանջով, մյուսը վերջերս գործին միացած փաստաբան Հայկ Ալումյանի միջնորդությունն է կալանքը գրավով փոխարինելու վերաբերյալ:
Ազգային ժողովի չորս տասնյակից ավելի պատգամավորներ երաշխավորություն են ներկայացրել դատարանին, նրանցից ոչ մեկը դեռ դատարանի շենքի բակ չի եկել, բողոքի գործողություններ չեն եղել:
Ռոբերտ Քոչարյանը 2008 թվականի մարտի 1-2-ի արյունալի իրադարձությունների գործով մեղադրվում է սահմանադրական կարգը տապալելու մեջ, հուլիսի 27-ին դատարանը նրա նկատմամբ խափանման միջոց է ընտրել կալանավորումը: Նախկին նախագահը և նրա շահերի պաշտպանները պնդում են, որ Քոչարյանի նկատմամբ քաղաքական հետապնդում է իրականացվում:
