Միացյալ Նահանգները նոր պատժամիջոցներ կսահմանի Ռուսաստանի նկատմամբ, երբ պարզվի, որ Ռուսաստանը նյարդապարալիտիկ նյութ է օգտագործել Մեծ Բրիտանիայում ռուս նախկին լրտես Սերգեյ Սկրիպալին և նրա դստերը թունավորելու համար: Պետդեպարտամենտը հայտարարել է, որ նոր պատժամիջոցները կգործեն օգոստոսի 22-ին կամ դրանից հետո:
Սկրիպալներին անգիտակից վիճակում հայտնաբերել էին մարտի 4-ին Սոլսբերիում՝ նստարանի վրա: Շաբաթներ շարունակ հիվանդանոցում բուժում ստանալուց հետո նրանք ապաքինվել են: Բրիտանական իշխանությունները պարզել են, որ Սկրիպալները թունավորվել են ԽՍՀՄ-ում արտադրված «Նովիչոկ» տեսակի նյարդապարալիտիկ նյութով: Ռուսաստանը հերքում է մեղադրանքները:
Վաշինգտոնում Ռուսաստանի դեսպանը երեկ «դրակոնային» է անվանել հավանական նոր պատժամիջոցները՝ պնդելով, որ ոչ Միացյալ Նահանգները, ոչ էլ Մեծ Բրիտանիան որևէ ապացույց չեն ներկայացրել կասկածների հետ կապված: