د میدان وردګو ولایت سیمه ییز چارواکي وایي چې په دغه ولایت کې د اعتراض کونکو لخوا د کابل ـ کندهار ـ کابل ـ بامیان تړل شوې لوې لارې د ټرافیکو پرمخ خلاصي شوې.
د والي ویاند عبدالرحمان منګل نن پنجشنبه ازادي راډيو ته وویل چې اعتراض کونکو تېره ورځ ناوخته وروسته له هغې دغې لارې بېرته د ټرافیکو پرمخ خلاصي کړي چې د دغه اعتراض کونکو یوې ډلې د افغانستان د ملي امنیت له سلاکار محمد حنیف اتمر سره وکتل.
نوموړي وویل، حنیف اتمر ورسره ژمنه کړې چې ټولو غوښتو ته به یې مثبت ځواب ووایي.
خو د دغه اعتراض یوه غړي د ولایتي شورا غړي شریف الله هوتک ازادي راډيو ته وویل چې د ولایت د مقام مخې ته د تحصن خېمه به تر هغو ټوله نه کړي چې ټولې غوښتنې یې عملاً پوره شوې نه وي.
د اعتراض کونکو یوه غوښتنه داده چې د دې ولایت نوم دې په ټولو رسمي ادارو، مکتوبونو او نویو برېښنایي تذکرو کې میدان وردګ ولیکل شي.
