Aqyarda mahkeme «Hizb ut-Tahrir işi» figurantı Seytosmanovğa tevqif müddetini uzattı
Advokat Sergey Legostov Qırım.Aqiqat muhbirine, Seytosmanovnıñ tahqiqat izolâtorında sentâbr 7-ge qadar qalacağını bildirdi.
Onıñ aytqanına köre, oturışuv qapalı rejimde keçti. İmaye mahkeme qararına qarşı şikâyetni daa yuqarı maqamğa bermek niyetinde.
Advokat, tahqiqat izolâtorında bulunğan vaqıtta Seytosmanovda sağlığı ile problemalar peyda olğanını iddia ete. Advokat onı yaqın vaqıtta ziyaret etmekni ve oña tibbiy yardımnıñ kösterilmesini talap etmekni planlaştıra.
Enver Seytosmanovnı Rusiye Cinayet kodeksiniñ 205.5 maddesiniñ 2-nci qısmı – «terroristik teşkilâtnıñ faaliyetinde iştirak etüv» boyunca qabaatlaylar. Rusiye telükesizlik hadimleri ağa-qardaş Ernes ve Enver Seytosmanovlarnı mayıs 10-da Aqyarnıñ Balıqlava rayonındaki Haytoda (Tılovoye köyünde) yapılğan tintüvden soñ yaqaladılar.
Daa soñra Ernesni yiberdiler. Enverge cinaiy işniñ başlatılması boyunca qararnı taqdim ettiler. Ertesi künü Rusiyeniñ kontroli altında olğan Aqyarnıñ Lenin rayonı mahkemesi Enver Seytosmanovnı tevqif etti.
Mevzuğa dair: Terrorizm şübhesi ile parmaqlıq artına: nevbetteki qırımlı «Hizb ut-Tahrir işi» boyunca tevqif etildi
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olar diniy alâmetke köre taqip etile, dep sayalar. Advokatlar, Rusiye uquqqoruyıcı organları tarafından bu iş boyunca taqip etilgenlerniñ çoqusı qırımtatar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.