რუსთავის საგამოცდო ცენტრი ეროვნული გამოცდებისთვის ემზადება
N22 საჯარო სკოლა გამოცდების დასრულებამდე გადასულია შეფასებისა და გამოცდების ეროვნული ცენტრის განკარგულებაში. შენობას იცავს დაცვის პოლიცია და სპეციალური სამსახური გაწვრთნილი ძაღლებით.
როგორც რადიო თავისუფლებას ადგილზე აცნობეს, შაბათს ცენტრი აღიჭურვება კომპიუტერებით. პირველი გამოცდა 2 ივლისს ჩატარდება, ქართული ენასა და ლიტერატურაში. საგამოცდო ცენტრს გამოცდების ორგანიზებაში ეხმარება რუსთავის თვითმმართველობის მიერ დაფუძნებული „რუსთავი-სერვისი“, რომელიც შენობის ეზოს აწესრიგებს. „რუსთავი-სერვისმა“ შემოსაზღვრა შენობის გარე პერიმეტრი რკინის გადასატანი ჯებირებით. შენობის შესასვლელი ადაპტირებულია შშმ პირებისთვის, თუმცა შიგნით ასეთი პირობები არ არის.
შეფასებისა და გამოცდების ეროვნული ცენტრის ინფორმაციით, 2018 წელს ეროვნულ გამოცდებზე დარეგისტრირდა 39 ათასამდე აბიტურიენტი, სტუდენტთა საგრანტო კონკურსზე - 4 500-ზე მეტი სტუდენტი, საერთო სამაგისტრო გამოცდაზე კი - 12 300-ზე მეტი კანდიდატი.