Tert.am-ի հետ զրույցում ՀՀ վարչապետի մամուլի քարտուղար Արման Եղոյանն անդրադառնում է հարցին, թե արդյոք վարչապետը ստորագրելու է և կամ չի ստորագրելու Աշխատանքի և սոցիալական հարցերի նախարարի պաշտոնից հրաժարական ներկայացրած Մանե Թանդիլյանի դիմումը, ինչու է հապճեպ մեկնել Արցախ, ինչպես նաև այլ հարցերի:
-Մանե Թանդիլյանի հրաժարականի հարցը, տեղեկությունը, որ հնարավոր է, որ նրա ազատման դիմումը չի ստորագրցվելու, իրականությանը համապատասխանո՞ւմ են:
-Դա չեմ կարող ասել, դա վարչապետն է որոշում, քանի որ հրաժարականի դիմումից հետո մենք Մոսկվայում էինք, դրանից հետո ուրբաթ էր, որ դիմումը հասել է վարչապետին, այսօր էլ արդեն Ղարաբաղում է: Այսինքն՝ հարցի պատասխանը կլինի երկուշաբթի՝ ըստ իս:
-Իսկ Նիկոլ Փաշինյանն այլ թեկնածուներ ունի՞:
-Նախարարին առաջարկում է նշանակել վարչապետը, քանի դեռ չի առաջարկել, չեմ կարող իմանալ՝ ունի, թե ոչ:
-Պարո՛ն Եղոյան, այսօր առավոտյան հայտնի դարձավ վարչապետ Նիկոլ Փաշինյանի՝ Արցախ մեկնելու մասին: Այցի մասին հայտարարված չէր, և այն ինչո՞վ է պայմանավորված՝ Արցախում ներքաղաքական իրավիճակի, կուտակումների: Ի վերջո, հիշենք, որ մոտ տասն օր առաջ կենցաղային հողի վրա բողոքի ալիքից ու հրաժարականներով իրավիճակի հանգուցալուծումից հետո ԱՀ նախագահի՝ հրաժարականի կրկին ակտիվացած պահանջներ եղան: Թե՞ պայմանավորվածէր առաջնագծում ադրբեջանական մարդուժի ու զինուժի կուտակումներով, ինչը պաշտոնապես հաստատվել էր:
-Վարչապետի հերթական աշխատանքային այցն է, որևէ արտահերթ իրողության հետ պայմանավորված չէ:
-Ինքը Մոսկվայում հիշատակեց՝ Բրյուսել..
-Դա ուշ ժամանակահատվածի համար պլանավորված այց է, դրա համար վարչապետը հայտարարել է դրա մասին, բայց այս մեկը այս պահին հերթական աշխատանքային այցն է: Տարբերակենք:
-Նիկոլ Փաշինյանը խոսեց այն մասին, որ ոչ մեկին թույլ չի տա, որ հեղափոխության անունը օգտագործեն մաֆիոզ պատերազմներում: Այսօր Էջմիածնում ահավոր լարված է՝ վաղուց խոսվում է քաղաքը ազատագրելու մասին, բայց եթե այսօր Էջմիածին, վաղը մեկ այլ քաղաք, մարդիկ որոշեն, որ քաղաքները պետք է ազատագրվեն տեղական «իշխաններից», չե՞ք կարծում, որ անարխիկ և քաոտիկ երևույթներ կսկսվեն:
-Չեմ կարող նման կանխատեսում անել և չեմ էլ կարող համաձայնել, որ ինչ-որ քաղաքներ ինչ-որ բան են որոոշում՝ ազատվել կամ չազատվել ինչ-որ մարդկանցից: Էջմիածինը համայնք է, ունի քաղաքապետ, և կան մարդիկ, ովքեր կողմ են իրենց համայնաքապետին՝ քաղաքապետին, կան մարդիկ, որոնք դեմ են, և որևէ խնդիր այստեղ չեմ տեսնում: Այն, ինչ կախված է վարչապետի լիազոություններից, ինքն արել է իր մեկնաբանությունը, բայց, ամեն դեպքում, համայնքը մնում է համայնք: Եվ կրկնում եմ՝ ներհամայնքային պայքարը չէի մեկնաբանի՝ որպես ինչ-որ համապետական մասշտաբի, ինչպես ասացիք՝ քաոտիկ որևէ գործընթացի սկիզբ:
-Մեկ հարց՝ սպորտին առնչվող: Նիկոլ Փաշինյանը ֆուտբոլի ո՞ր թիմին է երկրպագում:
-Հայաստանի Հանրապետության:
- Նկատի ունեմ՝ Աշխարհի առաջնությունում:
-Այո՛: Ինչ վերաբերում է եղած թիմերից, ապա «Ռաշիա թոդեյ»-ին վարչապետը նույն պատասխանը տվեց՝ բոլորին մաղթում է հաջողողություն: