ԱԺ «Ելք» խմբակցության պատգամավոր, «Քաղաքացիական պայմանագիր» կուսակցության անդամ Հովիկ Աղազարյանը Tert.am-ի հետ զրույցում, անդրադառնալով Էջմիածին քաղաքում տեղի ունեցող գործընթացներին և հնարավոր այլ մարզերում ու քաղաքներում նման զարգացումներ սկսելու վտանգին, տեսակետ հայտնեց, որ դրանք երկիրն անարխիայի վերածելու սպառնալիք չեն կարող լինել: «Իշխանությունները միշտ պատրաստ են կասեցնել այն գործընթացները, որոնք կլինեն սիրո և հեղափոխության փաթեթավորմամբ, սակայն հիմքում կլինեն ուրիշ նկրտումներ, այլ կարգուկանոն հաստատելու փորձը կանխելը կլինի անխուսափելի»,-ասաց նա:
-Պարո՛ն Աղազարյան, ինչպե՞ս եք գնահատում Էջմիածնում տեղի ունեցող գործընթացները, որն, այսպես ասած, վերահսկելի չէ իշխանությունների կողմից: Արդյո՞ք նման գործընթացները սպառնալիք չեն երկիրն՝ անարխիայի վերածելու, կամ գուցե տեղավորվո՞ւմ են հետհեղափոխական տրամաբանության մեջ:
- Ո՛չ, չեմ կարծում՝ որևէ սպառնալիք կա, բայց գիտեք՝ ի՞նչ, հեղափոխությունից հետո յուրաքանչյուրը յուրովի է պատկերացնում նախկին խնդիրների լուծումը, հետևաբար կլինեն որոշ մարդիկ, որոշ խմբավորումներ, որոնք հետապնդում են մեզ, երբեմն նեղ անձնական շահերով փորձում են ստեղծված իրավիճակն օգտագործել անձնական շահերին ծառայեցնելու: Հիմա Էջմիծնում բոլորս գիտենք՝ ինչ իրավիճակ է եղել 20 տարվա ընթացքում, դժգոհությունը միշտ եղել է նկատելի, և հակամարտող երկու ուժերն իրար դեմ են դուրս եկել, այնպես որ, չեմ կարծում, որ վտանգ պարունակի: Կարծում եմ՝ առաջիկայում ինչ-որ հանգուցալուծում կստանա:
-Վարչապետ Նիկոլ Փաշինյանն ասաց, որ թույլ չեն տա, որ քրեածին տարրերը պղծեն սիրո և համերաշխության հեղափոխության խորհրդանիշները և հեղափոխության անունը օգտագործեն մաֆիոզ պատերազմներում: Ըստ Ձեզ, ի՞նչ ճանապարհով է հնարավոր տարիներ ի վեր թշնամանք ունեցող ուժերին սաստել, կա՞ հանգուցալուծման իրավական ճանպարհ:
-Իհարկե, կա, եթե մինչ այսօր որևէ մեկը թույլ է տվել հակաիրավական արարք, ապա այդ ամենը կլուծվի նաև իրավական դաշտում, և վարչապետն այդ իմաստով իր մեսիջները տվել է՝ ի դեպ, ոչ միայն վարչապետ եղած ժամանակ, այլ նաև ոչ վարչապետ եղած ժամանակ, որ այդ հարցերը պետք է իրավական ճանապարհով լուծել: Ամեն դեպքում միանգամից այդ հարցերը կարգավորել անհնար է, որովհետև իրենք դա անում են այլ փաթեթավորմամբ, իբրև թե ծառայում են հեղափոխությանը, իբրև թե «այ իրենք լավ չեն արել, մենք լավ պետք է անենք» և այլն, և այլն, և նման փաթեթավորումը միանգամից դժվարացնում է համապատսխան դիրքորոշում ունենալը: Բայց կարևորը երկրի բարձրագույն քաղաքական ղեկավարության դիրքորոշումն է, որի ազդեցությունն, անպայման, կարծում եմ՝ վաղը կամ մյուս օրը կերևա հարցի դրսևորումների վրա:
- Ոստիկանապետ Վալերիյ Օսիպյանն էլ ասաց, որ հավաքների ազատության մասին օրենքը թույլ է տալիս ցանկացածին խաղաղ ցույցեր անցկացնել, և չեն կարող միջամտել, քանի դեռ օրենքի խախտում չկա:
- Եղել են մարդիկ, ովքեր նախորդ իշխանության ժամանակ, նախորդ տարիներին ապրել են ուրիշ օրենքներով և հիմա ուզում են նոր ստեղծված իշխանության պայմաններում օգտվել այն օրենքներից, որը բոլորի համար անընդունելի է: Իհարկե, չենք կարող արգելել, և եթե նրանք միայն դրանով կինքնամաքրվեն, օրենսդրական դաշտում կծավալեն և՛ քաղաքական, և՛ տնտեսական, և՛ ընդհանրապես իրենց գործունեությունը, մենք միայն ուրախ կլինենք: Բայց իշխանությունները միշտ պատրաստ են կասեցնել այն գործընթացները, որոնք կլինեն սիրո և հեղափոխության փաթեթավորմամբ, սակայն հիմքում կլինեն ուրիշ նկրտումներ, այլ կարգուկանոն հաստատելու փորձը կանխելը կլինի անխուսափելի:
-Գաղտնիք չէ, որ ոչ միայն Էջմիածնում, այլև շատ այլ մարզերում ու քաղաքներում կան տարբեր ակտիվ խմբավորումներ, այսպես ասած՝ «իշխանովորիկներ», ովքեր տարիներով պայքարել են միմյանց դեմ և ընտրությունից ընտրություն փորձել իրենց դիրքերն ավելի ամրապնդել: Հիմա չե՞ք կարծում, որ կարող է Էջմիածնում տեղի ունեցածը վարակիչ լինել մյուս մարզերում ու քաղաքներում, և իրավիճակը դառնա անվերահսկելի:
-Այդ խնդիրը մենք տեսել ենք նաև այն ժամանակ, երբ որ իշխանություն չէինք, ընդդիմություն էինք, մեր երկրի հիմքեը խարխլում են հենց նման տիպի անձնավորությունները և առաջնորդվելով միայն ու միայն անձնական շահերով՝ մեկ այս ուժին էին հակվում, մեկ մյուս ուժին, ընտրություններ կեղծում, որպեսզի իշխանություններին հաճոյանան և դիրքերն ամրապնդեն: Մենք դրանց դեմ իհարկե պայքարելու ենք և ունենք այդ ուժը և իհարկե ամեն ինչ կկարգավորենք: Իհարկե, վերահսկելի վիճակ է, չեն կարող այնպես անել, որ կազմակերպված դուրս գան, քանի որ նրանց ոտքերի տակ հողը թույլ է, իրենց արժեհամակարգն էլ թույլ է, և ժողովրդի լայն մասաները չեն ընդունում այդպիսի բաներ: Այո, նեղվում է ժողովուրդը, երբ որ թաղի մի հեղինակությունը գալիս է նստում, ասում է՝ «այս եմ արել, այն եմ արել», բայց ինչ էլ լինի, դա անընդունելի է հասարակության ճնշող մեծամասնության համար: Իսկ լուծումն այն է, որ բարձրագույն իշխանությունն այդ արժեհամակարգը բացարձակապես չի ընդունում, և դա արմատախիլ է արվելու, միանգամից չէ, իհարկե, բայց վստահ եղեք: Այնպես որ, վտանգավոր զարգացումներ չի կարելի սպասել, հակահեղափոխականությունը գործում է, և դա էլ հակահեղափոխականության դրսևորումներից մեկն է, որ ժողովուրդի վստահության վերաբերմունքը իշխանությունների հանդեպ թուլանա:
