Մենք հստակ խնդիր ենք ձևակերպել պետական եկամուտների կոմիտեի, Կառավարության առաջ, որ էականորեն մեծացվեն պետական եկամուտները:
Այս մասին ԱԺ-ում հայտարարեց վարչապետ Նիկոլ Փաշինյանը՝ պատասխանելով «Ծառուկյան դաշինք» խմբակցության պատգամավոր Տիգրան Ուրիխանյանի այն հարցին, թե երբ են բարձրացվելու թոշակներն ու աշխատավարձերը:
Վարչապետն ասաց, որ դա արվելու է ստվերի կրճատման, օրինականության ապահովման եղանակով: «Հայաստանում գործարարներն ազատված են որևէ կոռուպցիոն պարտավորությունից: Հույս ունենք, որ մյուս տարվա պետական բյուջեում մենք կնախատեսենք կենսաթոշակների ու աշխատավարձերի ավելացում»,- նշեց վարչապետ Փաշինյանը:
Այն հարցին, թե մեղավորները երբ են պատժվելու, Նիկոլ Փաշինյանը պատասխանեց, որ ցանկացած մարդ համարվում է անմեղ, քանի դեռ նրա մեղավորությունը օրենքով սահմանված կարգով չի ապացուցվել:
Տիգրան Ուրիխանյանը հստակեցրեց՝ փաստորեն այս տարի թոշակներն ու աշխատավարձերը չեն վերանայվելու, վերանայվելու են մյուս տարի:
Պատգամավորը նաև ասաց, որ ինքը նախորդ իշխանությունների «սև ցուցակում է» եղել, ինչին ի պատասխան Նիկոլ Փաշինյանն ասաց, որ խոստանում է իշխանական դարակներում փնտրել ու գտնել «սև ցուցակը» և տեղում վառել այն: