Ղրղզստանում մի շարք աղմկահարույց ձերբակալություններից հետո երկրի նախկին նախագահ Ալմազբեկ Աթամբաևը հանդես է եկել հայտարարությամբ՝ դատապարտելով իշխանություններին իր աջակիցների նկատմամբ հետապնդումների համար։ Նա իր աջակիցների ձերբակալությունները «քաղաքական շարժառիթ ունեցող» ու «անհիմն» է անվանել, գրում է «Независимая Газета»-ն:
«Ղրղզստանի նախկին վարչապետին (Սափար Իսակով) և Պետական մաքսային ծառայության նախկին նախագահ, մեր կուսակցության քաղաքական խորհրդի անդամ Կուբանըչբեկ Կուլմատովին ձերբակալելու որոշումը կոռուպցիայի դեմ պայքար չէ»,- հայտարարել է նա:
Ինչպես գրում է կայքը, նախկին նախագահը նշել է, որ խելամտությանն ի հակառակ՝ կոռուպցիայի մեղադրանքներով ձերբակալվել են մարդիկ, որոնք հենց առանձնացել են կոռուպցիայի դեմ պայքարում: «Սափար Իսակովի կառավարությունն այս տարվա չորս ամիսների ընթացքում ապահովել է 5 միլիարդ սոմի բյուջեի պրոֆիցիտ: Անկախ Ղրղզստանի պատմության մեջ առաջին անգամ է նման ցուցանիշ գրանցվում: Եվ այստեղ առանցքային դեր են խաղացել մաքսային մարմիններից վերադարձերը, որոնք Իսակովը և Կուլմատովը սկսել են մաքրել կոռուպցիոներներից»,- ասված է Աթամբաևի հայտարարությունում:
Կայքը հիշեցնում է, որ Իսակովի դեմ Բիշքեքի ՋԷԿ-ի արդիականացման ժամանակ կոռուպցիայի գործով մեղադրանք է առաջադրվել: Նա մեղադրվում է օտարերկրյա ընկերության շահերի լոբբինգով զբաղվելու համար:
Աթամբաևը նշել է, որ «մաքսային ծառայությունում թալանի մասշտաբները ցույց տված պետական գործիչների ձերբակալության մասին որոշումը ոչ անհայտ Ռաիմբեկ Մատրաիմովի (Մաքսային ծառայության ղեկավարի նախկին տեղակալ) ընկերների և հովանավորների վրեժն է, որի հեռացումից հետո հնարավոր դարձան դրական փոփոխություններ և մաքսային վճարումների կտրուկ աճ»:
Նրա խոսքով՝ «ո՛չ Իսակովը, ո՛չ Կուլմատովը, որին մեղադրում են ՋԷԿ-ի արդիականացման, շրջաններում երկու նոր դպրոցի կառուցման համար տրամադրված 2 միլիոն դոլարի դրամաշնորհային միջոցների անօրինական յուրացման համար, իրավասու չեն եղել ինքնուրույն որոշումներ կայացնել, որոնք ընկած են քննության կողմից առաջադրված մեղադրանքների հիմքում»: Աթամբաևը կարծում է, որ «կոռուպցիայի դեմ պայքարի մասին աղաղակների անվան տակ փաստացիորեն «վհուկների որս» է սկսվել նրանց նկատմամբ, ովքեր ունեն իրենց կարծիքը, իրենց դիրքորոշումը»:
Կարող եք կարդալ նաև՝
Ղրղզստանի նախկին ղեկավարները կարող են մեղադրյալների աթոռին հայտնվել. НГ