Տնտեսական մենաշնորհների գոյության միակ նպատակը իշխանության վերարտադրության համար անհրաժեշտ փողի ու կապիտալի կուտակումն է եղել: Այս մասին Ազգային ժողովում Կառավարության ծրագրի ներկայացման ժամանակ հայտարարեց վարչապետ Նիկոլ Փաշինյանը:
Ըստ նրա՝ իշխանությունը ստիպված է եղել հնարավոր բոլոր միջոցներով պաշտպանել մոնոպոլիաներին, փողի նկատմամբ վերահսկողություն է ծավալվել: Իսկ սա, Փաշինյանի խոսքով, արգելակել է իրական տնտեսական աճը, չնայած «տնտեսական աճ ապահովելու խնդիր իշխանության առաջ չի դրվել»:
«Բարեկեցիկ մարդը պակաս հակված կլինի ընտրակաշառքին, իսկ նման իրավիճակում փողերը կարող են չհերիքել: Որքան ցածր է քաղաքացու սոցիալական ու կրթական համակարգը, այնքան ավելի հնազանդ է նա կոռուպցիոն համակարգին: Հայաստանում տեղ գտած քայքայիչ երևույթները կապ ունեն իշխանությունը պահպանելու, ոչնչի առաջ կանգ չառնելու՝ թիմերի մոլուցքի հետ: Մեր կառավարության առաքելությունը քայքայիչ այս մտածողությունը Հայաստանից արմատախիլ անելն է: Սրա համար անհրաժեշտ բոլոր պայմաններն առկա են, որովհետև ՀՀ հպարտ քաղաքացին կարողացավ ջարդուփշուր անել ստրկացնող շղթաները»,- շեշտեց նա:
Նիկոլ Փաշինյանն ընդգծեց՝ իրենց կարևոր խնդիրը Հայաստանում արտահերթ խորհրդարանական ընտրությունների անցկացումն է, որոնց հիմնական նպատակը պետք է լինի արդար ու ազատ ընտրությունների անցկացումը, ժողովրդին իշխանություն վերադարձնելը:
«Հարց է ծագում՝ ինչո՞ւ արտահերթ ընտրություններ չանցկացնել հենց հիմա: Ընտրությունները հենց հիմա անցկացնելը մեր քաղաքական թիմին ամենաձեռնտու տարբերակն է, որովհետև «թավշյա հեղափոխության» ոգևորությունը գտնվում է իր գագաթնակետին, և կասկած չկա, որ մեր քաղաքական թիմը կհաղթի բացարձակ մեծամասնությամբ, եթե դրանք անցկացվեն այսօր: Եթե առաջնորդվենք այս տրամաբանությամբ՝ կնշանակի, որ իշխանությունը փոխվել է, բովանդակությունը՝ ոչ, և նոր իշխանությանը առաջ է մղում իշխանությունը պահելու մոլուցքը: Ընտրությունները պետք է անցկացվեն մեկ տարում, ինչի շնորհիվ քաղաքական մյուս ուժերը դուրս կգան ցայտնոտից և ընտրական նախապատրաստություններ կտեսնեն»,- շեշտեց Նիկոլ Փաշինյանը:
Ըստ վարչապետի՝ Ընտրական օրենսգիրքը լրջագույն փոփոխությունների է ենթարկվելու, ամրագրվելու է ընտրությունների թափանցիկությունը: Նա հայտնեց, որ ԸՕ փոփոխություններ անցկացնելու համար ստեղծվելու է աշխատանքային խումբ, որում կընդգրկվեն խորհրդարանական, արտախորհրդարանական ուժեր: