Բասկետբոլի ազգային ասոցիացիայի (NBA) կիսաեզրափակչում տեղի ունեցավ «Հյուսթոնի» ու «Գոլդեն Սթեյտի» միջև 5-րդ հանդիպումը:
Դրամատիկ անցած խաղում հաղթեցին «Ռոկետսի» բասկետբոլիստները` 98:94 հաշվով: Խաղի վերջում, երբ տանտերերը հաղթում էին 96:94 և խաղավարտին մնացել էր 6 վայրկյան, «Ուորիորզի» բասկետբոլիստները գրոհ անցկացրին, որը կարող էր հաղթական ավարտ ունենալ: Ամենակարևոր պահին Գրինը սայթաքեց ու, խախտելով կանոնները, տուգանային նշանակվեց ի օգուտ տանտերերի:
Խաղի ամենաարդյունավետ բասկետբոլիստ ճանաչվեց գործող չեմպիոնի առաջատարներից մեկը` Կևին Դուրանտը, ով հավաքել է 29 միավոր: «Հյուսթոնի» կազմում ամենաշատ միավորը վաստակեց Գորդոնը` 24 միավոր:
NBA, կիսաեզրափակիչ
«Հյուսթոն» - «Գոլդեն Սթեյտ»` 98:94 (23:17, 22:28, 26:27, 27:22)
Շարքի հաշիվը՝ 3:2
