Արտաքին գործերի նախագահ Զոհրաբ Մնացականյանն այսօր «Հայաստան» համահայկական հիմնադրամ հոգաբարձուների խորհրդի և տեղական մարմինների 27-րդ համատեղ նիստին լրագրողների հետ զրույցում անդրադարձավ Արցախը բանակցության կողմ ներգրավելու հարցին: «Մեր ներկայիս կարևորագույն նպատակը ներգրավվելն է բանակցությունների մեջ՝ բացառապես Մինսկի խմբի համանախագահության շրջանակներում»,-ասաց նա:
Tert.am-ի դիտարկմանը, թե ԱՄՆ նախագահ Դոնալդ Թրամփն Ալիևին ուղղված շնորհավորանքում ասել է, թե առաջիկայում հնարավոր է Արցախի խնդրի կարգավորումը, ՀՀ արտգործնախարարն ասաց, որ բոլորի հույսն է՝ կարգավորումը լինի շատ շուտով, բայց կարգավորումը պետք է արտահայտի մեր շահերը, ձգտումները, նպատակները: «Բնական է՝ մենք խոսում ենք կոմպրոմիսի մասին, բայց դրա հիմքում առաջին հերթին դրված է մեր շահերի ու նպատակների արտահայտությունը, որի հիմքում է Արցախի ժողովրդի ազատ ինքնորոշման իրավունքը»,-ասաց նա։
Զոհրաբ Մնացականյանն ասաց, որ ներկայում կարևորագույն հարցը բանակցությունների դինամիկան պահպանելն է։ Ինչ վերաբերում է իր ու Մամեդյարովի հնարավոր հանդիպմանը՝ Զոհրաբ Մնացականյանն ասաց, որ հանդիպումը հնարավորության հարց չէ, այլ բանակցությունների էությունն է, բանակցությունների ձևաչափի մեջ տեղավորվող գործընթաց է։
Անդրադառնալով ԵՄ-ի հետ Հայաստանի հարաբերություններին՝ նախարարը նշեց, որ արդեն գրանցել են բավականին մեծ առաջընթաց, կարևոր հանգրվանի են հասել։ «Այժմ կարևորությունը տրվում է փաստաթղթի դրույթների իրականացմանը, և գիտեք, որ հունիսի մեկից մենք անցնում ենք արդեն ժամանակավոր կիրառման, որն արդեն հնարավորություն է տալիս մեզ սկսել իրագործել, կյանքի կոչել փաստաթուղթը»,- ասաց նա: