Қирғизистон Бош прокуратураси Остонанинг қозоғистонлик фаол ва блогер Муратбек Тунгишбаевни топшириш борасидаги сўровини қондирди. 10 май куни Бишкекда ушланган Муратбек Тунгишбаев ўз ватанида рўйхатга олинмаган ва суд томонидан “экстремистик” деб топилган “Қозоғистон демократик танлови” ҳаракатига алоқадорликда айбланмоқда.
Қозоғистон томонининг Муратбек Тунгишбаевни топшириш борасидаги сўровини Қирғизистон Бош прокуратураси 21 май куни қаноатлантирган. Прокуратуранинг “жиноий жавобгарликка тортиш учун топшириш тўғрисида”ги қарорида Қозоғистон фаолга суд томонидан экстремист деб топилган “ташкилот тузганлик ва унинг фаолиятида иштирок этганлик” ҳамда “жиноий гуруҳ фаолиятини молиялаштирганлик” айбларини қўяётгани қайд этилади. Қарорда айтилишича, “таъқиб сиёсий ва қандайдир дискриминацион хусусиятга эга эмас” ва топширилаётган шахс қийноқларга дучор қилинмайди.
Тунгишбаев ҳозирда Қирғизистон Миллий хавфсизлик давлат қўмитаси тергов ҳибсхонасида тутиб турилибди. Тунгишбаевда прокуратура қарорини қўлга олгандан кейин 10 кун ичида судга мурожаат қилиш имконияти бор.
Қирғизистон куч ишлатар тузилмалари ходимлари 10 май куни Тунгишбаев хонадонига тинтувга келганлар. Яқинларига кўра, Тунгишбоев ватанида босимга учрагани туфайли 2014 йили Бишкекка келишга мажбур бўлган. Тинтув чоғида электрон ашёлар мусодара қилинган, фаол нинг ўзи эса ҳибсга олинган.
Тинтув ўтказиш учун берилган ҳужжатда Муратбек Тунгишбаев ва яна бир қозоғистонлик “Facebook ва Telegram ижтимоий тармоқлари орқали Мухтор Аблазов бошчилигидаги гуруҳга ахборот хизмати кўрсатгани” урғуланган. (Мухтор Аблазов —БТА Банк собиқ раҳбари, 2009 йилдан бери хорижда истиқомат қилади, Қозоғистон ҳукумати танқидчиси ва “Қозоғистон демократик танлови” (ҚДТ) ҳаракати таъсисчиларидан бири, бу ҳаракат 2018 йилнинг март ойида Остона суди томонидан экстремистик деб топилган - таҳр.) Тинтув ҳақидаги қарор матнида Тунгишбаев гўё “ҚДТ-фаол” гуруҳида фаолият юритади, тарафдорлар ёллайди, Остона томонидан тақиқланган “Қозоғистон демократик танлови” ҳаракатини дастаклаш мақсадида мунтазам равишда долзарб ва оғриқли мавзуларда муҳокама қўзғаш орқали ижтимоий тармоқ фойдаланувчилари радикаллашувини олқишлайди.
Фаолнинг адвокати Нурбек Тўқтақунов ва Тунгишбаевнинг рафиқаси Мерей Калиева 24 май куни Бишкекда бўлиб ўтган матбуот анжуманида блогерни Қозоғистонга топшириш борасидаги қарорга норозилик билдириб, айблов “сиёсий сабабларга кўра” уйдирилганини таъкидладилар. Адвокат Тўқтақунов фикрича, Қирғизистон Муратбек Тунгишбаевни Қозоғистонга топширмаслиги керак, чунки у Қирғизистон Давлат миграция хизматига ўзига сиёсий бошпана беришни сўраб мурожаат қилган ва бу мурожаат 15 май куни рўйхатга олинган. Адвокат ўз ҳимоясидаги Тунгишбаев иши бўйича Бош прокуратура чиқарган қарор юзасидан шикоят аризаси ҳозирланаётгани ва бу ҳужжатлар яқин орада Бишкекдаги Октябрь туман судига топширилишини билдирди.
