Մայիսի 25-ին տոնական մթնոլորտ է Հայաստանի դպրոցներում. աշակերտները հրաժեշտ են տալիս հարազատ կրթօջախներին, սիրելի ուսուցիչներին և դասընկերներին:
Tert.am-ը ներկա էր Երևանի Խաչիկ Դաշտենցի անվան 114 դպրոցի վերջին զանգի միջոցառմանը։ Այս դպրոցում են սովորել նաև ՀՀ նախագահ Արմեն Սարգսյանը, ապրիլյան պատերազմի հերոս Ադամ Սահակյանը և շատ այլ հայտնի մարդիկ։
Շրջանավարտների համար կարևոր օր է այսօր, նրանք ավարտում են դպրոցական կյանքը և պատրաստվում մտնել նոր՝ համալսարանական, աշխատանքային փուլ։
«Այս օրը իմ կյանքի ամենալավ օրերից մեկն է, 12 տարի այս տոնին եմ սպասել։ Դպրոցում անցկացվող միջոցառումից հետո տոնը շարունակելու ենք ռեստորանում»,- ասաց շրջանավարտը։
Աշակերտներից շատերն արդեն որոշել են իրենց մասնագիտությունները, մեկը պատրաստվում է Բժշկական համալսարան ընդունվել, մյուսն ընտրել է զբոսավարի մասնագիտությունը, երրորդը՝ ռեժիսորի։
Դասղեկ Արմինե Կոպալյանը նշում է, որ 30 տարվա աշխատանքի ընթացքում 8 անգամ շրջանավարտներ է ունեցել։
«30 տարի է շարունակ ճանապարհում ենք մեր երեխաներին նոր կյանք։ Շատ դժվար է, ամեն երեխայի հետ հուզվում ենք, ամեն շրջանավարտի հետ վերապրում ենք»,- ասաց դասղեկը։
