Սպասելու ենք ընդամենը 3 ամիս, եղե՛ք համբերատար և լավատես. Երևանի գլխավոր ճարտարապետը՝ մայրաքաղաքի 2800-ամյակին նվիրված այգու կառուցման վերաբերյալ
Երևանի գլխավոր ճարտարապետ Տիգրան Բարսեղյանն իր ֆեյսբուքյան էջում գրառում է կատարել, որում անդրադարձել է «Վարդանյան ընտանիք» բարեգործական ընտանիքի կողմից Երևանի 2800-ամյակին նվիրված այգու կառուցմանը:
Ճարտարապետը նշում է, որ սեփական շահերը վեր դասող որոշ մարդիկ փորձում են սևացնել արվող աշխատանքը և շինարարական, տվյալ դեպքում, հողային աշխատանքի լուսանկարները ներկայացնում են որպես բնության ավիրում:
Տիգրան Բարսեղյանի գրառումն ամբողջությամբ ներկայացնում ենք ստորև:
«Հարգելի՛ համաքաղաքացիներ,
«Վարդանյան ընտանիք» բարեգործական հիմնադրամը իր յուրօրինակ նվերն է մատուցում մայրաքաղաքին՝ նվիրելով Երևանի 2800-ամյակի այգի։ Ամեն ինչ ընթանում է նախատեսված ժամանակացույցով, և սեպտեմբերին Երևանն ունենալու է բարեկարգ և ժամանակակից լուծումներով մի այգի, որը միայն ու միայն ծառայելու է հենց հանգստի ու զբոսանքի նպատակով։
Կարծես թե այս գեղեցիկ նվերը պիտի միայն երախտիքի զգացմունք առաջացներ մարդկանց մոտ, և, համոզված ենք, որ այդպես էլ կա, հիմնականում, սակայն, կրկին ու կրկին սեփական ինչ-ինչ շահերը վեր դասող որոշ մարդիկ փորձում են սևացնել արվող աշխատանքը և շինարարական, տվյալ դեպքում, հողային աշխատանքի լուսանկարները ներկայացնում են որպես բնության ավիրում և այլն։
Միայն ներկայացվող նախագծի հպանցիկ դիտարկումը արդեն իսկ կարող է փարատել մեր համաքաղաքացիների մտահոգությունը այգու կանաչ տարածքների և ծառերի առկայության առումով, իսկ ուրարտյան ժամանակի զարդանախշերով սալահատակն ու ժամանակակից լուծումներով շատրվանների շքեղությունը հնարավոր կլինի գնահատել միայն դրանք գործարկելուց հետո։
Սպասելու ենք ընդամենը 3 ամիս։
Եղեք համբերատար և լավատես։
Ամեն ինչ արվում է ի շահ երևանցու և մեր սիրելի Երևանի»։