«Հալածանք, խտրականություն և ֆուտբոլի աշխարհի առաջնություն»
ՖԻՖԱ-ն պարտավոր է կիրառել բոլոր լծակները և Ռուսաստանի իշխանություններից պահանջել անհապաղ բարելավել աշխատանքային իրավունքները, մարդու հիմնարար իրավունքները և դադարեցնել իրավապաշտպաններին հալածելու գործելակերպը:
«Ռուսաստան. ՖԻՖԱ-ի աշխարհի առաջնությունը, մարդու իրավունքների ուղեցույց լրագրողների համար» Human Rights Watch-ի այսօր հրապարակած 44-էջանոց փաստաթղթում նշվում են աշխարհի առաջնությանը նախորդող շրջանում Ռուսաստանում գրանցված մարդու իրավունքների ոտնահարման բազում դեպքեր:
«Համաշխարհային մարզական այնպիսի միջոցառում, ինչպիսին ֆուտբոլի առաջնությունն է, միջազգային մամուլի ուշադրության կենտրոնում է: Մենք հուսով ենք, որ այս ուղեցույցը լրագրողներին կօգնի դիտարկել նաև այն, ինչ ֆուտբոլի դաշտից դուրս է, և ուշադրություն դարձնել Ռուսաստանում առկա մտահոգիչ հանգամանքների վրա»,- հայտարարել է Human Rights Watch-ի Եվրոպայի և Կենտրոնական Ասիայի բաժնի տնօրեն Հյու Ուիլյամսոնը:
Ըստ իրավապաշտպան կազմակերպության փորձագետների, իշխանությունը Ռուսաստանում մշտապես սահմանափակում է ազատ հավաքները և խոսքի ազատությունը, հետապնդում է այլախոհներին, գրաքննության է ենթարկում ոչ միայն ավանդական, այլև առցանց մամուլը:
Զեկույցում նշվում է մեկ օրինակ՝ մայիսի 11-ին ARD գերմանական հանրային հեռարձակող ընկերությունը հայտնել է, որ վետերան մարզական լրագրող Հեյո Սեպելտին չեն տրամադրել մուտքի արտոնագիր առաջնությունը լուսաբանելու համար: Ինչո՞ւ: Սեպելտն ակտիվորեն լուսաբանել է Ռուսաստանի դոպինգային սկանդալը:
«Պարզապես անընդունելի է, երբ լրագրողին զրկում են աշխատելու հնարավորությունից: ՖԻՖԱ-ն պարտավոր է անհապաղ միջամտել և պաշտպանել լրագրողի իրավունքը», - հայտարարել է Ուիլյամսոնը:
2017 թվականին Human Rights Watch-ը հրապարակել է զեկույց Ռուսաստանում ֆուտբոլի աշխարհի առաջնության մարզադաշտերը կառուցող բանվորների տարրական իրավունքները ոտնահարելու մասին:
Շինարարների միջազգային միությունը հաղորդել է, որ 2018-ի ապրիլի դրությամբ, ռուսական մարզադաշտերի կառուցման ընթացքում զոհվել է 21 բանվոր:
Եգիպտոսի ազգային հավաքականը մարզվելու է Չեչնիայի մայրաքաղաք Գրոզնիում: Չեչնիան, ըստ Human Rights Watch-ի, Ռուսաստանում ամենառեպրեսիվ տարածքն է: Memorial (Հուշամատյան) ռուսական իրավապաշտպան կազմակերպության Չեչնիայի բաժանմունքի տնօրեն Օյուբ Տիտիևին շինծու մեղադրանքով բանտ են նետել:
Ի դեպ, դեռ Սովետում կար այլախոհի գրպանը կանեփ դնելու և նրան թմրադեղի տարածման հոդվածով դատելու էժան գործելակերպը: Տիտիևին կարող են դատապարտել ընդհուպ մինչև 10-ը տարվա ազատազրկման:
Չեչնիայի ղեկավար Ռամզան Կադիրովը բազմիցս հաշվեհարդարով է սպառնացել իրավապաշտպաններին և նրանց անվանել է «ազգի դավաճաններ»: Փետրվարին Human Rights Watch-ը ՖԻՖԱ-ի նախագահ Ջանի Ինֆանտինոյին կոչ է արել Ռուսաստանի նախագահ Վլադիմիր Պուտինի հետ զրույցում անպայման արծարծել չեչեն իրավապաշտպանի հարցը:
2017-ին ՖԻՖԱ-ն որդեգրել է «Մարդու իրավունքների պաշտապանության քաղաքականություն»: «Այնտեղ, որտեղ մարդու իրավունքները վտանգվում են, ՖԻՖԱ-ն կդիմի անհրաժեշտ միջոցների, այդ թվում տվյալ երկրի իշխանության վրա ազդելու լծակին», - ասվում է այդ փաստաթղթում, որին Human Rights Watch-ը հավանություն է տվել:
«ՖԻՖԱ-ն դեռ ունի մարդու իրավունքների հարցում Ռուսաստանի իշխանության վրա ճնշում բանեցնելու ժամանակ: Դա բխում է ֆուտբոլի շահերից: Անհրաժեշտ է ամեն բան անել, որ այս հրաշալի խաղի մրցույթը չանցնի դիսկրիմինացիայի և ճնշումների անճոռնի մթնոլորտում», - հայտարարել է է Human Rights Watch-ի Եվրոպայի և Կենտրոնական Ասիայի բաժնի տնօրեն Հյու Ուիլյամսոնը: