Թուրքիայում Իսրայելի դեսպանը կանչվել է ԱԳՆ
Թուրքիայում Իսրայելի դեսպանը կանչվել է երկրի արտգործնախարարություն, այս մասին գրում է թուրքական Anadolu գործակալությունը։
Դեսպանն ԱԳՆ է կանչվել Գազայի դեպքերի հետ կապված, հայտնի է, որ նրան կոչ են արել լքել երկիրը։
Թուրքիայի արտգործնախարար Մևլյութ Ճավուշօղլուն ավելի վաղ անիծել էր Իսրայելին՝ ասելով, որ տեղի ունեցածը իսկական կոտորած է, որի մեղավորն ԱՄՆ-ն է։
Թուրքիայի նախագահ Ռեջեփ Թայիփ Էրդողանն ահաբեկչական պետություն է անվանել Իսրայելը և հետ կանչել Թել Ավիվում ու Վաշինգտոնում իր դեսպաններին՝ ստեղծված իրավիճակի շուրջ խորհրդակցության համար։
«Ես այս հարցով հանդիպումներ ու հեռախոսազրույցներ եմ ունենալու բազմաթիվ անձանց, այդ թվում՝ Պաղեստինի նախագահ, հարգելի Մահմուդ Աբբասի ու ՄԱԿ-ի գլխավոր քարտուղարի հետ։ Մենք վճռական կերպով շարունակելու ենք լինել մեր եղբայր պաղեստինցի ժողովրդի կողքին։ Մենք՝ որպես իսլամական աշխարհ, երբևէ թույլ չենք տա, որ այս օրը դառնա մեզ համար Երուսաղեմը կորցնելու օր», - ասել է Էրդողանը։
Նախօրեին Իսրայելում տեղի է ունեցել ԱՄՆ դեսպանատան՝ Թել Ավիվից Երուսաղեմ տեղափոխումը, ինչը լուրջ բախումների մեկնարկի պատճառ է դարձել Գազայի գոտում։ Պաղեստինցի ցուցարարների և իսրայելցի ուժայինների բախումների հետևանքով 59 մարդ է զոհվել։