«Մահմեդականներին մի՛ օգտագործիր, նրանց սուտ մի՛ ասա»․ Էրդողանին մեղադրել են Գազայի դեպքերը քարոզչական նպատակներով օգտագործելու համար
Թուրքիայի ընդդիմադիր Ժողովրդահանրապետական կուսակցությունից նախագահի թեկնածու առաջադրված Մուհարրեմ Ինջեն մեղադրել է գործող նախագահ Ռեջեփ Թայիփ Էրդողանին պաղեստինցի ժողովրդի ողբերգությունն իր ներքաղաքական շահերի ու քարոզչական նպատակներով օգտագործելու համար, գրում է թուրքական «Ջումհուրիյեթ» պարբերականը։
«Անցյալ անգամ ասում էր՝ «Գազա պիտի գնամ, իմ այցից հետո Գազան շրջափակումից դուրս կգա»։ Գնացի՞ր։ Մե՛ղք է․․․Այնտեղ մահմեդականներն են ցավ քաշում, մահանում, մի՛ արա նման բան։ Ճշմարիտ քաղաքականությա՛մբ զբաղվիր։ Դիմացից Իսրայելի դեմ խոսելով՝ հետևում նրանց հետ գործարք մի՛ կնքիր։ Մահմեդականներին մի՛ օգտագործիր, նրանց սուտ մի՛ ասա», - ասել է Ինջեն։
Հիշեցնենք, որ Էրդողանն ահաբեկչական պետություն է անվանել Իսրայելը և հետ կանչել Թել Ավիվում ու Վաշինգտոնում իր դեսպաններին՝ ստեղծված իրավիճակի շուրջ խորհրդակցության համար։
«Ես այս հարցով հանդիպումներ ու հեռախոսազրույցներ եմ ունենալու բազմաթիվ անձանց, այդ թվում՝ Պաղեստինի նախագահ, հարգելի Մահմուդ Աբբասի ու ՄԱԿ-ի գլխավոր քարտուղարի հետ։ Մենք վճռական կերպով շարունակելու ենք լինել մեր եղբայր պաղեստինցի ժողովրդի կողքին։ Մենք՝ որպես իսլամական աշխարհ, երբևէ թույլ չենք տա, որ այս օրը դառնա մեզ համար Երուսաղեմը կորցնելու օր», - ասել է Էրդողանը։
Նախօրեին Իսրայելում տեղի է ունեցել ԱՄՆ դեսպանատան՝ Թել Ավիվից Երուսաղեմ տեղափոխումը, ինչը լուրջ բախումների մեկնարկի պատճառ է դարձել Գազայի գոտում։ Պաղեստինցի ցուցարարների և իսրայելցի ուժայինների բախումների հետևանքով 59 մարդ է զոհվել։