Աշխատող թոշակառուները կազատվեն թոշակի վերահաշվարկի համար տեղեկանք ներկայացնելու անհրաժեշտությունից․ նախագիծ
Ազգային ժողովի առողջապահության և սոցիալական հարցերի մշտական հանձնաժողովում քննարկեց «Պետական կենսաթոշակների մասին» օրենքում փոփոխություններ կատարելու մասին նախագիծը։
Սոցիալական ապահովության հարցերի փոխնախարար Սմբատ Սաիյանն ասաց, որ աշխատող թոշակառուները գործող օրենքով ամեն տարի տեղեկանք են ներկայացնում, որ իրենց թոշակը վերահաշվարկվի, իսկ փոփոխությամբ՝ տեղեկանք տանելու անհրաժեշտություն չի լինի։
«Մենք ազատում ենք աշխատող թոշակառուներին տեղեկանք ներկայացնելու անհրաժեշտությունից։ Ներդրվում է նաև էլեկտրոնային համակարգ, որպեսզի թոշակը հաշվվի առցանց եղանակով»,- ասաց Սաիյանը։
Հարակից զեկուցող, հանձնաժողովի նախագահ Հակոբ Հակոբյանն էլ նշեց, որ այսպիսով աշխատող կենսաթոշակառուի համար ստեղծվում է պայման, որ մեկ դիմումով կամ առցանց եղանակով նա ունենա հնարավորություն իր կենսաթոշակի վերահաշվարկը կատարելու։
Զեկուցողին ու հարակից զեկուցողին հարցեր չհնչեցին։ Պատգամավորները կողմ արտահայտվեցին օրենքի նախագիծը լիագումար նիստ ընդգրկելու մասին։