Тақчиллик туркманистонликларни совет даври тиллаларини сотишга мажбур қилмоқда
Озодликнинг Лебапдаги мухбирига кўра, бозорларда совет давридаги кўплаб тилла тақинчоқлар пайдо бўлган. Бу тилла тақинчоқлар ўтган асрнинг 80-йиллари ва ундан аввалги даврларга оиддир.
Туркманистонда гаровхоналар (ломбардлар) йўқ. Аҳолидан тилла ашёларни савдогарларнинг ўзлари сотиб олади. Маҳаллий аҳолига кўра, асосан Россиянинг 585 ва 583 пробали тиллаларига қизиқиш катта бўлмоқда.
Айтишилишича, Туркманистонда тилланинг нархи кўтарилиб кетди. Хусусий шахслардан бир грамм олтин айни дамда 200 манатдан (тақрибан 57 АҚШ доллари) сотиб олинмоқда.
Сўнгги ойларда Туркманистон хорижида ҳам мамлакат ватандошлари иштирокида олтин контрабандаси билан боғлиқ ҳодисалар қайд қилинмоқда. Аввалроқ Ҳиндистоннинг Индира Ганди аэропортида божхоначилар томонидан 19 килограмм олтинни контрабанда йўли билан олиб ўтишга уринган 28 нафар туркманистонлик (22 нафари аёл) ушлангани тўғритсида хабар тарқатилган.