გერმანიის ფედერალურმა პოლიციამ განაცხადა, რომ მისი არსებობის პერიოდში უმსხვილესი ოპერაცია ჩაატარა ორგანიზებული დანაშაულის წინააღმდეგ. ადამიანებით ვაჭრობის, იძულებითი პროსტიტუციის და სექსუალური ექსპლუატაციის წინააღმდეგ მიმართულ ოპერაციაში მონაწილეობდა ათასზე მეტი პოლიციელი, მათ შორის სპეცრაზმელები. გერმანიის მასშტაბით 18 აპრილს ჩატარებული ოპერაციის შედეგად დაკავებულია ასზე მეტი ეჭვმიტანილი. ფედერალური პოლიცია უკვე რამდენიმე ხანია იძიებს საქმიანობას ორგანიზებული დანაშაულებრივი ჯგუფისა, რომლის ძირითად ნაწილს წარმოადგენს გერმანიის და ტაილანდის ოცამდე მოქალაქე. ისინი ეჭვმიტანილნი არიან ადამიანებით ვაჭრობაში სექსუალური ექსპლუატაციის მიზნით. გამოძიების ინფორმაციით, კრიმინალური ჯგუფის ორგანიზებით, ტაილანდიდან გერმანიაში უკანონოდ ჩაიყვანეს რამდენიმე ასეული ქალი და ტრანსსექსუალი.