Ամերիկյան Reddit սոցկայքի հիմնադիր-ղեկավար Ալեքսիս Օհանյանն օրիգինալ ձևով է ողջունել կնոջ՝ համաշխարհային ճանաչում վայելող թենիսիստուհի Սերենա Ուիլյամսի վերադարձը մեծ թենիս:
Երեսունչորսամյա միլիոնատերը Կալիֆորնիայի Փալմ Սփրինգս քաղաքի տարբեր հատվածներում գտնվող գովազդային վահանակներին փակցրել է կնոջ ու նորածին դստեր՝ Օլիմպիա Օհանյանի լուսանկարները:
Ընդհանուր առմամբ, տեղադրվել է 4 վահանակ, որոնց վրայի գրությունները միացնելու դեպքում ստացվում է հետևյալ նախադասությունը՝ «Բոլոր ժամանակների լավագույն մայրիկը՝ Սերենա Ուիլյամս»:
«Օլիմպիա Օհանյանն ու ես ցանկացանք ողջունել նրա (Սերենա Ուիլյամսի-Tert.am) վերադարձը թենիսի ասպարեզ: Դիզայնն իմն է, փոքրիկն էլ օգնել է»,-Instagram-ում տեղադրված լուսանկարների շարքը մակագրել է Օհանյանը:
Հիշեցնենք, որ ամուսինների դուստրը ծնվել է 2017թ. սեպտեմբերի մեկին: