Երեկ՝ Երուսաղեմի ժամանակով ուշ երեկոյան, քաղաքի Սուրբ Հարության տաճարի հետ կապված անսպասելի զարգացումներ են տեղի ունեցել, ինչի արդյունքում որոշվել է բացել տաճարի դռները. երկրի վարչապետի գրասենյակից իրավատեր համայնքներին առաջարկվել է սկսել բանակցություններ:
Այս մասին Tert.am-ին հայտնեց Երուսաղեմի Հայոց պատրիարքարանի դիվանապետ Կորյուն վարդապետ Բաղդասարյանը, ով երեկ հայտարարել էր, որ Երուսաղեմի Սուրբ Հարության տաճարի դռները փակ են պահելու այնքան ժամանակ, մինչև հարկային և հողային հարցերին վերաբերող 2 որոշումները չեղարկվեն:
Ավելին՝ նրանք այսօր պետք է թռուցիկներ բաժանեին տաճար այցելող զբոսաշրջիկներին, ուխտավորներին ու հավատացյալներին` բացատրելու, թե ինչու են տաճարի դռները փակ:
«Երեկ կեսօրից հետո Իսրայելի վարչապետի գրասենյակի կողմից հաղորդագրություն տարածվեց, ինչից վերհասու եղանք, որ բոլոր գործողությունները` թե՛ քաղաքապետարանի որոշումը, թե՛ Քնեսեթի շրջանառվող այս օրինագիծը կասեցվել են, և հատուկ հանձնաժողովով է նշանակվել վարչապետի կողմից` բանակցություններ սկսելու երեք քրիստոնեական եկեղեցիների ներկայացուցիչների հետ: Այդ իսկ պատճառով երեկ՝ ուշ երեկոյան, հոգևոր պետերը որոշեցին եկեղեցու դռները բացել և բանակցությունների միջոցով հարցի լուծումը գտնել»,- ասաց Կորյուն վարդապետը:
Փաստորեն, երեկ երեք եկեղեցիների հոգևոր պետերի հավաքից հետո՝ ուշ երեկոյան, տեղի է ունեցել երկրորդ հավաքը:
Առայժմ բանակցությունների մեկնարկի ժամկետը նշված չէ, սակայն կազմը հայտնի է` մի կողմից լինելու են Ներքին գործերի, Ֆինանսների, Արտաքին գործերի նախարարություններից և քաղաքապետարանից ներկայացուցիչներ, մյուս կողմից` երեք իրավատեր եկեղեցիների ներկայացուցիչներ:
Հիշեցնենք, որ քաղաքապետարանի հաշվարկների համաձայն՝ եկեղեցիները քաղաքային բյուջեին պարտք են ավելի քան 186 մլն դոլար:
Հարցին, թե ընդառաջման պատճառը քաղաքի կրած հազարավոր դոլարի վնասներն էին, Կորյուն վարդապետը դժվարացավ պատասխանել.
«Չեմ կարող ասել` ինչի արդյունքում եկան այդ եզրակացության, որ պետք է կասեցվեն իրենց որոշումները, բայց փաստ է, որ դրանք կասեցված են, հրահանգ կա` բանակցությունների միջոցով հարցին լուծում տալ:
Հիշեցնենք, որ տաճարի վերաբացումից հետո հարյուրավոր ուխտավորներ եկեղեցում աղոթում են՝ ծնկի իջած ու արտասվելով: