Արցախ այցելելու համար Ադրբեջանում դատապարտված, սակայն ավելի ուշ ազատություն ստացած ռուս-իսրայելցի բլոգեր Ալեքսանդր Լապշինը Facebook-ի իր էջում զինծառայողի պատկերով վերնաշապիկով լուսանկար է հրապարակել և առաջարկել է իր հետևորդներին գուշակել, թե որ երկրի բանակի զինվոր է պատկերված:
«Ընկերներ, հավանո՞ւմ եք իմ վերնաշապիկը: Այն շատ հատուկ է: Ի՞նչ եք կարծում՝ ո՞ր բանակի զինվորն է այնտեղ պատկերված: Միանգամից նախազգուշացնեմ, որ այնտեղ ես չեմ»,- գրել է բլոգերը:
Նա նշել է, որ իր հրապարակած երկրորդ լուսանկարում զինվորի օրիգինալ լուսանկարն է:
Նշենք, որ լուսանկարում պատկերված է Արցախում ծառայություն իրականացնող հայ ժամկետային զինծառայող:
Հիշեցնենք, որ Բաքվի ծանր հանցագործությունների դատարանը բլոգեր Ալեքսանդր Լապշինին դատապարտել էր երեք տարվա ազատազրկման: Ինչպես նշվել է դատավճռում, Ալեքսանդր Լապշինը մեղավոր է ճանաչվել 318.2 հոդվածով, որը նախատեսում է պատիժ «հանցավոր խմբի կազմում Ադրբեջանի պետական սահմաններն անօրինական կերպով հատելու համար»:
Ռուսաստանի, Իսրայելի և Ուկրաինայի քաղաքացի հանդիսացող բլոգեր Ալեքսանդր Լապշինը ձերբակալվել է Մինսկում 2016 թվականի դեկտեմբերի 15-ին՝ Ադրբեջանի դիմումի համաձայն, և արտահանձնվել Բաքվին 2017 թվականի փետրվարի 7-ին՝ 2011 թվականի ապրիլին, 2012 թվականի հոկտեմբերին և 2016 թվականի հունիսին Արցախ այցելելու, ինչպես նաև Ադրբեջանի քաղաքականությունը քննադատելու համար: Սեպտեմբերի 14-ին Լապշինը լքել է Ադրբեջանի տարածքն ու մեկնել Իսրայել:
