Սիրիայի հյուսիսում գտնվող քրդական ազգային զինված ջոկատների քաղաքական թևի՝ PYD-ի ղեկավար Սալիհ Մուսլիմը, որն օրեր առաջ Թուրքիայի տրամադրած միջազգային օրդերի հիման վրա ձերբակալվել էր Չեխիայում, ազատ արձակումից հետո առաջին անգամ խոսել է լրատվամիջոցների հետ:
Թուրքիայում մինչ օրս քուրդ գործչի հանդեպ ձերբակալման ու կալանավորման երեք դատական որոշում է կայացվել՝ ահաբեկչական հարձակումների ծրագրման մեղադրանքով:
Ինչպես գրում է T24 կայքը, Մուսլիմը պատմել է, որ տեղյակ է եղել իր հանդեպ հետախուզման հրամանի մասին, սակայն լուրջ չի վերաբերվել դրան:
«Գիտեի, որ Թուրքիան հետախուզում է հայտարարել իմ նկատմամբ, սակայն լուրջ չվերաբերվեցի դրան: Չեխիայում չգիտեմ, թե ուր եմ գնալու, սակայն Ֆինլանդիայում կացության թույլտվություն ունեմ», - ասել է Մուսլիմը:
Հիշեցնենք, որ Թուրքիայի նախագահ Ռեջեփ Թայիփ Էրդողանն ավելի վաղ հույս էր հայտնել, որ Չեխիան հնարավորինս շուտ կարտահանձնի PYD ղեկավարին: Չեխական դատարանը, սակայն, Մուսլիմին ազատ արձակելու որոշում է կայացրել:
