Rusiye 2014 senesi baarindeki Qırımnıñ ilhaqından soñ Ukrainağa ait Qara deñiz şelfi territoriyasınıñ üçte ekisini qanunsız olaraq zapt etti. Bunı Ukraina Devlet geologiya ve yeraltı baylıqlar hizmetiniñ reisi vazifesini vaqtınca eda etken Oleg Kirilük fevralniñ 22-sinde matbuat konferentsiyasında beyan etti.
Ukrainanıñ UNİAN haber agentligi Kirilükniñ sözlerini naqil etip: «Qırımnıñ ilhaqından soñ Qara deñiz şelfinde keşif etilgen yedekler bayağı büyük edi. Ukrainanıñ territoriyasında bulunğan ve 130 biñden ziyade kvadrat metrni teşkil etken şelfniñ territoriyasında tayin etilgen yedekler 100-den 300-ge qadar milliard kub metr gaznı teşkil ete edi. Qırımnıñ ilhaqından soñ şelfimizniñ territoriyası üç qat eksildi ve 40 biñge yaqın kvadrat metrni teşkil ete. Biz tetqiqatı yapılmaqta olğan ve tayin etilgen yedekleri olğan territoriya aqqında söz yürsetemiz», – dep bildire.
Ekspertniñ sözüne köre, Ukrainanıñ kontroli altında qalğan şelfniñ qısımlarında tayin etilgen gaz yedekleri 37 milliardğa yaqın kub metrni teşkil eteler. Ondan ğayrı, Azav deñiziniñ şelfindeki yedekler 10 milliardğa yaqın kub metrni teşkil eteler.
«Naftogaz Ukrainı» Milliy aktsioner şirketi Rusiyeni ilhaq etilgen Qırımdaki yataqlardan Ukraina gazınıñ hırsızlağanında qabaatladı.
2014 senesinde Rusiye tarafından Qırımnıñ ilhaqı esnasında Ukrainağa ait «Çernomorneftegaz» şirketiniñ burğu tertibatları, flot ve diger mal-mülkü zapt etilgen edi. Bundan soñ NAK «Naftogaz Ukrainı» bu Qırım şirketi üzerindeki kontrolini ğayıp etti. Daa soñra GAO «Çernomorneftegaz» Ukrainanıñ qıta qısmındaki ğayrıdan meydanğa ketirildi.
2016 senesi oktâbrniñ 17-sinde NAK «Naftogaz Ukrainı» ve onıñ altı şube şirketi, gruppağa ait Qırımdaki aktivlerniñ zapt etilmesi neticesinde körgen zararlarnıñ ödenmesini talap etip, Rusiyege qarşı arbitraj davasını başlattılar. «Naftagaz» davanı, Ukraina Nazirler kabineti ile Rusiye ükümeti arasındaki ytırımlarğa qol tutuv, yatırım yapuv ve yatırımlarnı qarşılıqlı qorçalav aqqında añlaşmağa muvafıq olaraq açtı.
Bu ayda Rusiye kütleviy haber vastaları, adları bildirilmegen üç Rusiye memurınıñ sözlerini menba olaraq kösterip, Rusiye ükümetiniñ halqara arbitrajda Ukraina ile devletlerara dava sebebinden Qırım şelf zonasında eñ büyük olğan Odessa yatağında ğaz çıqarılmasını toqtatacaq olğanını bildirdiler.
