Միացյալ Նահանգների նախագահ Դոնալդ Թրամփը Սպիտակ տանն ընդունել է փետրվարի 14-ին Ֆլորիդայի դպրոցներից մեկում տեղի ունեցած արյունալի հարձակման զոհերի ծնողներին ու միջադեպի ականատես դպրոցականներին:
Ինչպես նշում է The Daily Mail-ը, լրագրողների աչքից չի վրիպել, որ 71-ամյա ղեկավարը հանդիպմանը ներկայացել է հուշաթերթիկով:
Խոշորացված կադրերում երևում է, որ դրա վրա գրված են հետևյալ նախադասությունները՝ «Ես ձեզ լսում եմ», «Ի՞նչն է ձեզ ամենից շատ անհանգստացնում, որի մասին կցանկայիք, որ ես իմանայի», «Մենք ի՞նչ կարող ենք անել, որ դուք ձեզ ավելի ապահով զգաք»:
Ավելի վաղ հաղորդվել էր, որ հանդիպման ընթացքում նախագահն առաջարկել է զինել դպրոցների ուսուցիչներին, որպեսզի ապագայում հնարավոր լինի կանխել արյունալի հարձակման պես ողբերգությունները:
«Եթե դուք ունենայիք այնպիսի ուսուցիչ, որը զենք կունենար, ապա նա կկարողանար արագ վերջ դնել հարձակմանը: Մենք պատրաստվում ենք այս հարցը լրջորեն ուսումնասիրել, թեև համոզված ենք, որ կգտնվեն բազմաթիվ ընդդիմախոսներ»,-ասել է Թրամփը:
Հիշեցնենք, որ փետրվարի 14-ին 19-ամյա Նիկոլաս դե Խեսուս Կրուզը, զինված ինքնաձիգով ու նռնակներով, ներխուժել էր դպրոց՝ սպանելով 17 մարդու: Հետագայում պարզվել է, որ նա սպիտակամորթ ռասիստների գաղափարախոսության հետևորդ է: Աուտիզմով տառապող երիտասարդը ծնողազուրկ է ու անկարգապահության պատճառով հեռացվել էր այդ դպրոցից:
