Ես դեմ եմ, որ ԱԺ-ը հայտարարություն ընդունի մարտի 1-ի դեպքերի տասնամյակի առթիվ, որովհետև դրա անհրաժեշտությունը չկա, դրա նպատակահարմարությունը չկա, դրա անհրաժեշտության հիմնավորումներն են բացակայում: Այս մասին «Շանթ» հեռուստաընկերության եթերում ասել է ԱԺ պատգամավոր, ՄԻԵԴ-ում ՀՀ ներկայացուցիչ Գևորգ Կոստանյանը:
«Ես ԱԺ-ում հնարավորություն ունեցա «Ելք» խմբակցության ներկայացրած հայտարարությունը կետ առ կետ գնահատելու և դետալային քննարկելու թե՛ դրա իրականացման գործընթացները, այսինքն՝ այն կետերը, որոնց ընդհանրապես չարժեր ուշադրություն դարձնել, թե՛ այն տեսակետից՝ ինչ է տալու ԱԺ-ի հայտարարությունն այս պրոցեսին: Միաժամանակ, իհարկե, մեզ համար էլ անընդունելի էր այդ վիճակը և ոչ միայն անընդունելի էր, այլ ես առիթ ունեցա ասելու, որ մարտի 1-ը՝ այդ ամբողջ իրադարձությունների կոմպլեքսը, բացարձակ ամոթալի երևույթ էր, էլ չեմ խոսում հետևանքների անթույլատրելիության մասին: Բայց ամոթալի երևույթ էր մեր ամբողջ պետության համար՝ միջազգային վարկանիշի, ներքին քաղաքականության կազմակերպման, ցանկացած տեսակետից»,-ասել է Գևորգ Կոստանյանը:
Նրա ձևակերպմամբ՝ այդ ամենը, սակայն, չի նշանակում, որ Ազգային ժողովի հայտարարություններ ընդունելու եղանակով որևէ բան այդ գործընթացում պետք է լուծել. «Ուզում եք 38 հայտարարություն ընդունենք կամ ամեն օր ԱԺ-ի հայտարարություն ընդունենք, չեն փարատելու այն մտահոգությունները, որ ունենք և՛ մենք, և՛ մեր հասարակությունը, և՛ այս դեպքում մեր ընդդիմադիր գործընկերները»:
Դիտարկմանը, թե չկա մարտի 1-ի դեպքերի պաշտոնական գնահատական, պատգամավորը պատասխանել է. «Ես համաձայն չեմ, որովհետև պետությունը ստեղծեց ժամանակավոր պառլամենտական հանձնաժողով, որպեսզի այդ ժամանակավոր հանձնաժողովն ունենա արժանահավատության պատշաճ մակարդակ, այդ թվում՝ միջազգային մակարդակի, դրա համար նախագահի կարգադրությամբ ստեղծվեց նաև փաստահավաք խումբ: Այսինքն՝ մենք չենք կարող խոսել, որ պետությունն անմասն մնաց մարտի 1-ի դեպքերը որևէ կերպ գնահատականի արժանացնելուց, ընդհակառակը՝ ստեղծվեցին այդ մարմինները, և ԱԺ ժամանակավոր հանձնաժողովը զեկույց հրապարակեց այդ կապակցությամբ՝ հայտնի և բավականին ծավալուն, ամբողջական զեկույց»:
Գևորգ Կոստանյանը վստահեցրել է, որ եթե հայտարարությունը չընդունվի ԱԺ-ի կողմից կամ որևէ ուղերձ չլինի, դա չի նշանակում, որ պետությունն ընդհանրապես վերաբերմունք չցուցաբերեց այդ երևույթին. «Փաստահավաք խումբը ստեղծվեց նախագահի կարգադրությամբ, որ օգնի ԱԺ-ի ժամանակավոր հանձնաժողովին և փաստահավաք առաքելություն իրականացնի, այսինքն՝ ձեռք բերի այնպիսի փաստեր, որոնց հիման վրա հանձնաժողովը պետք է եզրակացություն ընդունի: Փաստահավաք առաքելությունը ստեղծված չէր եզրակացություն կամ ամբողջական գնահատական տալու համար: Փաստահավաք խումբը ստեղծված էր՝ հավաքելու անհրաժեշտ փաստեր, հիմքեր, որոնք պառլամենտական ժամանակավոր հանձնաժողովի համար հիմք կլինեն՝ եզրակացություն անելու համար»:
Հարցին, թե ենթադրենք ԱԺ-ը հայտարարություն է տարածում, որ դատապարտում է 10 զոհերի փաստը և ընդհանրապես տեղի ունեցածը, դա ինչո՞վ է խանգարելու, ի՞նչ ունեք դրա դեմ, պատգամավորն ասել է. «Մենք դրա դեմ ոչինչ չունենք, բայց մենք խոսում ենք այն մասին, թե դա ինչ օգուտ է տալու, որովհետև, եթե մենք խոսում ենք այն մասին, թե մի բան անենք, մեկ է, ոչ մի բան չի խանգարելու, ես դրա կողմնակիցը չեմ: Ես ավելի շատ կողմնակից եմ անել ինչ-որ բան, որը ինչ-որ բանին օգնելու է և ոչ թե խանգարելու տեսակետից է դիտարկվելու»: