Մենք պարտավոր ենք արձանագրել, որ սումգայիթյան ցեղասպան գործողություններն իրականացնողները չեն հասել իրենց նպատակին. ՀՀ ԱԺ արտաքին հարաբերությունների մշտական հանձնաժողովի կողմից նախաձեռնած «Սումգայիթյան ջարդեր. հայատյացությունը որպես Ադրբեջանի պետական քաղաքականություն» թեմայով խորհրդարանական լսումներին հայտարարեց ՀՀԿ պատգամավոր Սամվել Ֆարմանյանը:
Ֆարմանյանը շեշտեց, որ այդ օրերի իրադարձությունները գրեթե ամբողջությամբ փաստագրված են՝ պատմագրության մասնագետների, առանձին նվիրյալների ջանքերով, վերապրածների պատմություններով, արխիվների մեկտեղմամբ, և դրանք ակնհայտ խոսում են այն մասին, որ դա տեղի է ունեցել կազմակերպված և առնվազն խորհրդային իշխանությունների թողտվության պայմաններում:
Սամվել Ֆարմանյանը շեշտեց, որ, սակայն, նրանց նպատակները ձախողվել են: «Այո, դա մեր ժողովրդի համար արժեցել է ևս մեկ տրավմա, բայց և՛ խորհրդային իշխանությունները, և՛ Ադրբեջանի իշխանությունները չեն հասել իրենց նպատակին՝ Արցախյան շարժումը ծավալվել է, և Արցախն ազատագրվել է»,-ասաց նա և նշեց, թե նպատակը պարզ էր՝ կասեցնել Արցախյան շարժման ծավալումը:
Պատգամավորի հաջորդ արձանագրումն այն էր, որ թե՛ Սումգայիթը, թե՛ դրանից առաջ և դրան հաջորդած իրադարձությունները և մինչև վերջին շրջանում տեղի ունեցած իրադարձություններն ու հայտարարությունները խոսում են կարևոր գործընթացի մասին:
«Ադրբեջանում շարունակվում է իրենց ազգային ինքնության ձևավորման, տրանսֆորմացիայի մի շատ հետաքրքիր գործընթաց, որտեղ հայատյացությունը նշանակալի առանձնահատկություն է ձեռք բերում: Որքան էլ դա մեզ դուր չգա, բայց այլատյացությունը պատմականորեն բերում է բացասական հետևանքների, և մենք սա պետք է նկատի ունենանք»,-ասաց նա: